நடிகர் தனுஷ் இயக்கி, கதாநாயகனாக நடித்துள்ள திரைப்படம் 'ராயன்'. இந்தத் திரைப்படம் கடந்த ஜூலை 26ம் தேதி உலகளவில் வெளியாகி மிகப்பெரிய அளவில் வரவேற்பைப் பெற்றுள்ளது. சன் பிக்சர்ஸ் சார்பில் கலாநிதி மாறன் தயாரித்துள்ள இப்படத்திற்கு இசையமைப்பாளர் ஏ. ஆர். ரஹ்மான் இசையமைத்துள்ளார். 

இந்தப் படத்தை பா. பாண்டி படத்திற்குப் பிறகு இரண்டாவதாக தனுஷ் இயக்கியுள்ளது குறிப்பிடத்தக்கது. தனுஷுடன் இந்தப் படத்தில் எஸ். ஜே. சூர்யா, பிரகாஷ்ராஜ், செல்வராகவன், காளிதாஸ் ஜெயராம், சுந்தீப் கிஷன், துஷாரா விஜயன், அபர்ணா பாலமுரளி, வரலக்ஷ்மி சரத்குமார் உள்ளிட்ட பலர் நடித்துள்ளனர். 

வட சென்னையை கதைக்களமாகக் கொண்டுள்ள இந்தத் திரைப்படத்தை தனுஷ் ஒரு செண்டிமெண்ட் கலந்த ஆக்ஷன் படமாக இயக்கியுள்ளார். ஓம் பிரகாஷ் ஒளிப்பதிவையும், பிரசன்னா ஜி. கே. படத்தொகுப்பு பணிகளையும் கச்சிதமாக செய்துள்ளனர். 

நீண்ட நாட்களுக்குப் பிறகு ரஹ்மானின் இசையில் பாடல்கள் அனைத்தும் ரசிகர்களைக் கவர்ந்துள்ளது குறிப்பிடத்தக்கது. இந்தப் படத்தை தூக்கி நிறுத்துவது தனுஷ் 50 சதவீதம் என்றால், ரஹ்மான் 50 சதவீதம் என்று நிச்சயமாகக் கூறலாம் என்று ரசிகர்கள் தெரிவித்துள்ளனர். 

இந்நிலையில் ராயன் திரைப்படம் வெளியாகி 4 நாட்களில் தமிழகத்தில் சுமார் 40 கோடிக்கு மேல் வசூலும், உலகளவில் சுமார் 83 கோடியும் வசூல் செய்துள்ளதாகத் தெரிய வந்துள்ளது. மேலும் கூடிய விரைவில் 'ராயன்' திரைப்படம் 100 கோடி பாக்ஸ் ஆபீஸ் சாதனை படைக்கும் என்று எதிர்பார்க்கப் படுகிறது.