இயக்குனர் லோகேஷ் கனகராஜ் இயக்கத்தில் நடிகர் விஜய் நடிபில், திரிஷா உள்ளிட்ட பல பிரபலங்கள் நடித்த திரைப்படம் ‘லியோ’. இந்தத் திரைப்படம் கடந்த 19ம் தேதி திரையரங்குகளில் வெளியானது. ஆனால், இதற்கு முன்பாக இந்த படம் குறித்த அப்டேட் வரும்போதெல்லாம் ஏதாவது ஒரு பிரச்சினை எழுந்து கொண்டே இருந்தது.

அதாவது, படத்தின் இசை வெளியீட்டு விழா நடத்துவதாக இருந்த நிலையில், அது திடீரென ரத்து செய்யப்பட்டது. இதைத் தொடர்ந்து டிரெய்லரில் விஜய் ஆபாசமாக பேசியிருந்ததால் கண்டனங்கள் எழுந்தன. இந்த நிலையில் இந்தப் படம் வெளியான பின்பு, படம் எப்படி இருக்கிறது என்பது குறித்து இரு மாதிரியான விமர்சனங்கள் வருகின்றன. 

இதையடுத்து படத்தின் தயாரிப்பாளர் லலித்குமார் படத்தின் வசூல் குறித்து அதிகாரப்பூர்வமாக அறிவித்தார். அந்த அறிவிப்பின் படி லியோ திரைப்படம் வெளியாகி 7 நாட்களில் ரூ 461 கோடி வசூலை குவித்துள்ளது என்று அறிவிக்கப்பட்டது.

இந்த நிலையில், தற்போது ‘லியோ’ படத்தின் வெற்றி விழா கொண்டாட்டம் குறித்த அறிவிப்பு ஒன்று வெளியாகியுள்ளது. அதாவது நேரு உள்விளையாட்டு அரங்கில் நடைபெறும் இந்த ‘லியோ’ படத்தின் வெற்றி விழாவில் நடிகர் விஜய் கலந்து கொள்வதால் பாதுகாப்பு கோரி படத் தயாரிப்பாளர் லலித்குமார் பெரியமேடு காவல் நிலையத்திற்கு கடிதம் அனுப்பியுள்ளார்.