லியோ படத்தின் அனிமேஷன் டீசரை விஜய் ரசிகர் ஒருவர் தனது ட்விட்டர் பக்கத்தில் வெளியிட்டுள்ளார். இந்த வீடியோ பலரது கவனத்தை ஈர்த்துள்ளது.

இன்று விஜயின் 49-வது பிறந்த நாள் தினம். இதனையொட்டி பல்வேறு மாஷ் அப்களையும், வீடியோக்களையும் தயாரிப்பு நிறுவனங்களும், செய்திச் சேனல்களும், நடிகர் விஜயின் ரசிகர்களும் வெளியிட்டு வருகின்றனர். அந்த வரிசையில் மேடி மாதவ் என்ற விஜய் ரசிகர், லியோ படத்தின் அனிமேஷன் டீசரை வேறு கதைக் களத்தில் வெளியிட்டிருந்தார். அந்த டீசர் வீடியோவில் நடிகர் விஜயின் உருவத்தை மிக நேர்த்தியாகவும், தத்ரூபமாகவும், ஸ்டைலாகவும் அனிமேஷனில் அவர் வடிவமைத்திருந்ததை கண்டு பலரும் ஆச்சர்யப்பட்டுள்ளனர்.

இதனால் இந்த வீடியோ இணையத்தில் வைரலாகி வருகிறது. இந்த வீடியோவை 70 லட்சத்திற்கும் மேற்பட்டோர் பார்த்து ரசித்துள்ளனர். பல சினிமா பிரபலங்களும், ரசிகர்களும் இந்த வீடியோவை பார்த்து அந்த ரசிகரை பாராட்டி வருகின்றனர்.. லியோ படத்தை லோகேஷ் கனகராஜ் இயக்கி வருகிறார். இதன் படப்பிடிப்பு காஷ்மீரில் நடைபெற்று வருகிறது.

இந்தப் படத்தில் த்ரிஷா, சஞ்சய் தத், அர்ஜூன், பிரியா ஆனந்த், மிஷ்கின், கவுதம் வாசுதேவ் மேனன், மன்சூர் அலி கான் ஆகியோர் நடிக்கின்றனர். இந்தப் படத்தை செவன் ஸ்க்ரீன் ஸ்டூடியோ தயாரிக்கிறது. வரும் அக்டோபர் மாதம் இந்தப் படம் வெளியாகும் என எதிர்பார்க்கப்படுகிறது. லியோ படத்தின் ‘நான் ரெடி’ முதல் சிங்கிள் பாடல் இன்று மாலை 6.30-க்கு வெளியாகும் என படக்குழு ஏற்கனவே அறிவித்திருந்தது.