தாஜ்மஹால் திரைப்படத்தின் மூலம் தமிழ் சினிமாவில் கதாநாயகனாக அறிமுகமானவர் மனோஜ் பாரதிராஜா. இவர் இயக்குனர் இமயம் பாரதிராஜாவின் மகனாவார். தற்போது  இயக்குனர் சுசீந்திரன் தயாரிப்பில் திரைப்படம் ஒன்றை இயக்க இருக்கிறார்.

தமிழ் சினிமாவின் முன்னணி இயக்குனரான சுசீந்திரன் வெண்ணிலா ப்ரொடக்ஷன்ஸ் என்ற தயாரிப்பு நிறுவனம் சார்பாக புதிய திரைப்படம் ஒன்றை தயாரிக்கிறார். இந்த திரைப்படத்தின் மூலம் இயக்குனராக அறிமுகமாகிறார் பாரதிராஜாவின் மகன் மனோஜ் பாரதிராஜா. இத்திரைப்படத்திற்கு ஜிவி பிரகாஷ் குமார் இசையமைக்கிறார்.

புது முகங்கள் முன்னணி  கதாபாத்திரங்களில் நடிக்கும் இந்த திரைப்படத்தில் பாரதிராஜா முக்கிய வேடத்தில் நடிக்க இருக்கிறார் என்பது குறிப்பிடத்தக்கது. இத்திரைப்படத்தின் ஃபர்ஸ்ட் லுக் வருகின்ற மார்ச் 31ஆம் தேதி தமிழ் சினிமாவின் 10 முன்னணி இயக்குனர்களால் வெளியிடப்பட இருக்கிறது.

பம்பாய் திரைப்படத்தின் போது மணிரத்தினத்திடம் மனோஜ் உதவி இயக்குனராக பணியாற்றி இருக்கிறார் என்பது குறிப்பிடத்தக்கது. இதனைத் தொடர்ந்து தனது குருவை சந்தித்து ஆசி பெற்று வந்திருக்கிறார் மனோஜ். மேலும் இந்தத் திரைப்படம் பற்றி கூறுகையில் தனக்கு இயக்குனராக வாய்ப்பளித்த சுசீந்திரனுக்கு நன்றியை தெரிவித்தார். 

இசைக்கு முக்கியத்துவம் கொடுத்து உருவாகும் இந்த திரைப்படத்தில் ஜிவி பிரகாஷ் குமாரின் பின்னணி இசையும் பாடல்களும் முக்கியத்துவம் பெறும் என கூறினார். இத்திரைப்படத்திற்கான படப்பிடிப்புகள் அடுத்த மாதம் இறுதியில்  தொடங்கப்படும் என பட குழுவினர் அறிவித்துள்ளனர்.