கேரள மாநிலம், இடுக்கி அடிமாலி அருகே உள்ள பன்னீர்யர்குட்டி ஊரைச் சேர்ந்தவர் 55 வயதான போஸ். இவரது மனைவி 48 வயதான ரீனா, இருவரும் நேற்று முள்ளக்காணம் பகுதியில் உள்ள உறவினரின் வீட்டுக்கு ஜீப் வாகனத்தில் சென்றனர். அதன் பின்பு இரவு நேரத்தில் அங்கிருந்து அவர்களின் வீட்டுக்கு திரும்பி வந்து கொண்டிருந்தனர். அந்த ஜீப்பை ஆப்ரகாம் (50) என்பவர் ஓட்டினார். இதைத் தொடர்ந்து பன்னீர்யர்குட்டியில் உள்ள மசூதி அருகே வந்தபோது அவர்களது ஜீப் ,டிரைவரின் கட்டுப்பாட்டை இழந்து 100 அடி பள்ளத்தில் கவிழ்ந்தது.

செங்குத்தானப் பள்ளத்தாக்கு:

 இந்த நிகழ்வை அப்பகுதி  மக்கள் பார்த்து அதிர்ந்து போயினர். சற்றும் தாமதிக்காமல் உடனே அவர்கள் போலீசாருக்கு தகவல் கொடுத்தனர். இதனை அடுத்து சம்பவம் இடத்திற்கு வந்த போலீசாரும் தீயணைப்பு வீரர்களும் பொதுமக்களின் உதவியுடன் ஜீப்பை மீட்கும் பணியில் ஈடுபட்டனர். இந்த விபத்து நடந்த இடம் செங்குத்தானப் பள்ளத்தாக்கு பகுதியாக இருந்ததால் , அவர்கள் கடும் சிரமத்திற்கு மத்தியில் ஜீப் விழுந்த பகுதிக்குச் சென்றனர். மேலும் ஜீப்புக்குள் சிக்கிக் கொண்டிருந்த போஸ்,ரீனா,ஆபிரகாம் ஆகிய மூன்று பேரையும் மீட்டு பள்ளத்தாக்கில் இருந்து மேலே கொண்டு வந்தனர்.

மருத்துவமனையில் அனுமதித்தனர்:

பின்பு படுகாயம் அடைந்திருந்த மூன்று பேரையும் ஆம்புலன்ஸ் மூலமாக மருத்துவமனைக்கு கொண்டு செல்லப்பட்டனர். ஆனால் செல்லும் வழியிலேயே போஸ் மற்றும் ரீனா ஆகிய இருவரும் இறந்து விட்டனர். மேலும் எர்ணாகுளத்தில் உள்ள மருத்துவமனையில் அனுமதிக்கப்பட்டிருந்த ஆபிரகாம் இன்று அதிகாலை பரிதாபமாக உயிரிழந்தார். இந்த விபத்தில் பலியான மூன்று பேரின் உடல்களும்  அடிமாலி தாலுக்கா மருத்துவமனைக்குப் பிரேத பரிசோதனைக்காகக் கொண்டுச் செல்லப்பட்டுள்ளது. இந்த விபத்து தொடர்பாக போலீசார் வழக்குப் பதிவு செய்து விசாரணை நடத்தி வருகின்றனர். 

வீராங்கனை சகோதரி:
மேலும் இந்த விபத்தில் கணவருடன் பலியாகி இருக்கும் ரீனா என்பவர், கேரளாவை சேர்ந்த பிரபல தடகள வீராங்கனை பீனா மோலின் சகோதரி ஆவார். பள்ளத்தில் ஜீப் கவிழ்ந்த விபத்தில் ஒலிம்பிக் வீராங்கனை சகோதரி உட்பட மூன்று பேர் பலியான சம்பவம் இடுக்கியில் பரிதாபத்தையும், அதிர்ச்சியையும் ஏற்படுத்தியுள்ளது.