நாட்டில் முக்கிய இடங்களுக்கு அதிகளவில் வெடிகுண்டு மிரட்டல் விடுக்கப்பட்டு வருகிறது. அதிலும், தலைநகர் டெல்லியில் உள்ள பள்ளிகளுக்கு சமீப நாட்களாக வெடிகுண்டு மிரட்டல் அதிகம் வந்துகொண்டிருக்கிறது. அந்த வகையில் இன்று டெல்லியில் பல்வேறு பள்ளிகளுக்கு மின்னஞ்சல் மூலம் வெடிகுண்டு மிரட்டல் வந்துள்ளது. 

இந்த வெடிகுண்டு மிரட்டல் வாரத்தின் 3வது வெடிகுண்டு மிரட்டல் சம்பவமாகும். வெடிகுண்டு மிரட்டல் வந்த பள்ளிகளில் பாதுகாப்புப் பணியாளர்கள் தேடுதல் நடவடிக்கைகளை மேற்கொண்டனர். ஆனால் சந்தேகத்திற்கிடமான பொருள் எதுவும் கிடைக்கவில்லை.

இது குறித்து டெல்லி தீயணைப்புத்துறை அதிகாரி ஒருவர் தெரிவித்ததாவது:- "வெடிகுண்டு மிரட்டல் விடுக்கப்பட்டதாக காலை 5.02 மணிக்கு எங்களுக்கு அழைப்பு வந்தது. உடனே, தீயணைப்புத் துறை, உள்ளூர் போலீஸார், நாய்ப் படைகள் மற்றும் வெடிகுண்டு கண்டறியும் குழுக்கள் பள்ளிக்கு வந்து தேடுதல் நடவடிக்கையில் ஈடுபட்டனர். 

அப்போது சந்தேகத்திற்கிடமான பொருள் எதுவும் கிடைக்கவில்லை. இருப்பினும் பள்ளியில் தொடர்ந்து தேடுதல் நடவடிக்கை நடைபெற்று வருகிறது. துவாரகாவில் உள்ள 5 பள்ளிகளுக்கும், மற்ற மாவட்டங்களில் உள்ள சில பள்ளிகளுக்கும் இதே போன்று மின்னஞ்சல் மூலம் மிரட்டல் வந்துள்ளது என்றுத் தெரிவித்துள்ளார். 

இந்த சம்பவம் தொடர்பாக போலீசார் வழக்குப்பதிவு செய்து பள்ளிகளுக்கு மின்னஞ்சல் அனுப்பிய நபர் குறித்து விசாரணை மேற்கொண்டு வருகின்றனர்.