95வது ஆஸ்கர் விருது விழா மேடையை அதிர வைத்த நாட்டு நாட்டு பாடல் நடனத்திற்கு அரங்கில் இருந்த அனைவரும் எழுந்து நின்று பாராட்டு தெரிவித்துள்ளனர்.

பிரபல இயக்குநர் ராஜமவுலி இயக்கத்தில் கடந்த வருடம் மார்ச் 25-ஆம் தேதி வெளியான ‘ஆர்ஆர்ஆர்’ திரைப்படம் உலகம் முழுவதும் ரூ.1200 கோடியை வசூலித்து மிகப்பெரிய வெற்றியைப் பெற்றது. இப்படத்தில் ஜூனியர் என்டிஆர், ராம் சரண், அஜய் தேவ்கன், ஆலியாபட், ஸ்ரேயா சரண் உள்ளிட்ட பல பிரபலங்கள் நடித்திருந்தனர். 

Here's the energetic performance of "Naatu Naatu" from #RRR at the #Oscars. https://t.co/ndiKiHeOT5 pic.twitter.com/Lf2nP826c4

— Variety (@Variety) March 13, 2023

இந்த படத்திற்கு எம்.எம்.கீரவாணி இசையமைத்திருந்தார். இந்நிலையில் இப்படத்தில் இடம்பெற்ற ‘நாட்டு நாட்டு’ பாடல் ஆஸ்கர் விருதுக்கு அனுப்பி வைக்கப்பட்டது. இதைத்தொடர்ந்து, ‘நாட்டு நாட்டு’ பாடல் ஆஸ்கர் நாமினேஷனில் தேர்வானது.

இந்நிலையில் 95வது ஆஸ்கர் விருதுகள் வழங்கும் விழா இந்திய நேரப்படி இன்று காலை 5.30 மணிக்கு அமெரிக்காவின் லாஸ் ஏஞ்சல்ஸ் நகரில் கோலாகலமாக தொடங்கி நடைபெற்று வருகிறது. இதில் ஆஸ்கர் விருது விழா மேடையில் 'நாட்டு நாட்டு' பாடலை பாடகர்கள் ராகுல் சிப்லிகுஞ்ச் மற்றும் கால பைரவா ஆகியோர் பாடினர். இந்த பாடலுக்கு கலைஞர்கள் நடனமாடினர். இந்நிலையில் ஆஸ்கர் விருது விழா மேடையை அதிர வைத்த நாட்டு நாட்டு பாடல் நடனத்திற்கு, அரங்கில் இருந்த அனைவரும் எழுந்து நின்று பாராட்டு தெரிவித்துள்ளனர்.