மஹாராஷ்டிரா மாநிலத்தில் உள்ள மும்பையில் சாலையில் இருசக்கர வாகனத்தில் சென்று கொண்டிருந்த இளம்பெண் ஒருவர், அருகில் சென்று கொண்டிருந்த இருசக்கர வாகனத்தை உதைத்த போது நிலைத்தடுமாறி கீழே விழுந்த வீடியோ இணைய தளத்தில் வைரலாகி வருகிறது. 

மும்பையில் உள்ள ஒரு நெடுஞ்சாலையில் ஒரு இளைஞர் தனது தோழியுடன் இருசக்கர வாகனத்தில் சென்று கொண்டிருக்கிறார். அவர்கள் சாலையில் தாறுமாறாக சென்றுகொண்டிருந்ததால், பின்னால் இருசக்கர வாகனத்தில் வந்த இளைஞர் ஒருவர், "ஏன் இப்படி பொறுப்பில்லாமல் வண்டி ஓட்டுகிறீர்கள்" என்றுக் கேட்டுள்ளார். 

இதன் காரணமாக, அவர்களுக்கு இடையே வாக்குவாதம் ஏற்பட்டுள்ளது. அதன் பின்னர் அவர்கள் தங்கள் வழியில் செல்ல, இருசக்கரவாகனத்தில் பின்னால் அமர்ந்திருந்த அந்தப் பெண் தங்களிடம் வாக்குவாதம் செய்த இளைஞரின் இரு சக்கரவாகனத்தை உதைக்கிறார். ஆனால் அடுத்த நொடியே அந்த பெண்  நிலைத்தடுமாறி ஓடிக்கொண்டிருந்த இருசக்கர வாகனத்தில் இருந்து தலைக்கீழாக கீழே விழுகிறார்.

இந்த நிகழ்வை பின்னால் காரில் வந்த ஒருவர் தனது செல்போனில் வீடியோ எடுத்து சமூக வலைதளத்தில் பதிவிட அது தற்போது வைரலாகி வருகிறது. வண்டியை தாறுமாறாக ஓட்டியதை கேள்வி கேட்டதால் பொங்கி எழுந்த அந்த பெண் செய்த தவறான செயல், அவருக்கே பாதகமாக மாறியுள்ளது. இந்த வீடியோ இணையதளத்தில் வைரலாகி வருவது ஒருபுறம் இருக்க, சாலையில், வரம்பு மீறி சென்ற அந்தப் பெண்ணை சமூகதளவாசிகள் ட்ரோல் செய்து வருகின்றனர்.