புதுச்சேரியில் நள்ளிரவில் வாலிபர் கழுத்தை அறுத்து கொலை செய்த சிறுவர்கள் குறித்து போலீசார் தீவிரமாக விசாரணை மேற்கொண்டு வருகின்றனர்.

புதுச்சேரி மாநிலம் நெட்டப்பாக்கம் அருகே நேற்று நள்ளிரவு கல்மண்டபம்-அந்தராசி குப்பம் மெயின் ரோட்டில் வாலிபர் ஒருவர் கழுத்து அறுத்து, மார்பில் கத்திகுத்து காயங்களுடன் கொலை செய்யப்பட்டு கிடந்துள்ளார்.

இதைப் பார்த்து அவ்வழியாக சென்றவர்கள் இது குறித்து நெட்டப்பாக்கம் காவல்துறையினருக்கு தகவல் தெரிவித்துள்ளனர். இந்த தகவலையடுத்து சம்பவ இடத்திற்கு விரைந்து வந்த போலீசார், இதுகுறித்து விசாரணை மேற்கொண்டனர்.

இந்த விசாரணையில் அந்த வாலிபர் அந்த ராசி குப்பம் பகுதியை சேர்ந்த காமராஜ் (33) என்பதும், இவர் தனியார் தொழிற்சாலையில் ஊழியராக வேலை பார்த்து வந்ததும் தெரிய வந்தது. மேலும் நேற்று நள்ளிரவு வேலை முடிந்து மோட்டார் சைக்கிளில் வீட்டிற்கு சென்று கொண்டிருந்தபோது மது போதையில் ஒரு கும்பல் தகராறில் ஈடுபட்டுள்ளது.

இதனை காமராஜ் தட்டி கேட்டதால் ஆத்திரமடைந்த அவர்கள் காமராஜின் கருத்தை அறுத்து, மார்பில் கத்தியால் குத்தி கொலை செய்ததும், அவர்கள் 17 வயதுக்குட்பட்ட 7 சிறுவர்கள் என்பதும் விசாரணையில் தெரிய வந்துள்ளது.

இதைத்தொடர்ந்து போலீசார், இந்த சம்பவம் குறித்து வழக்கு பதிவு செய்து காமராஜை கொலை செய்த சிறுவர்கள் குறித்து தீவிரமாக விசாரணை மேற்கொண்டு வருகின்றனர்.