#ஈரோடு || மீம்ஸ் வீடியோ பதிவிட்ட அதிமுக ஐடி விங் நிர்வாகி கைது..!!

திமுக அரசு ஆட்சி பொறுப்பேற்றதிலிருந்து தமிழக அரசையும் தமிழக முதல்வர் மு.க ஸ்டாலினையும் சமூக வலைதளங்களில் விமர்சனம் செய்யும் நபர்கள் தொடர்ந்து கைது செய்யப்பட்ட வருகின்றனர். குறிப்பாக அதிமுக, பாஜக, நாம் தமிழர் கட்சியைச் சேர்ந்த ஐடி விங் நிர்வாகிகளின் சமூக வலைதள கணக்குகள் முடக்கப்படுவதும், கைது நடவடிக்கை மேற்கொள்வதும் தொடர் கதையாகி வருகிறது.

அந்த வகையில் ஈரோடு மாவட்ட அதிமுக தகவல் தொழில்நுட்ப பிரிவு நிர்வாகி மொடக்குறிச்சி கௌதம் என்பவர் இன்று பிற்பகல் ஈரோடு மாவட்ட காவல்துறையினரால் கைது செய்யப்பட்டுள்ளார். நேற்று முதல்வர் பேசிய வீடியோ குறித்து மீம் வீடியோ சமூக வலைத்தளத்தில் பதிவிட்டதால் அவர் கைது செய்யப்பட்டுள்ளதாக முதற்கட்ட தகவல் தெரிவிக்கின்றன.

காவல் துறையினரால் கைது செய்யப்பட்டுள்ள மொடக்குறிச்சி கௌதம் பெருந்துறை டிஎஸ்பி அலுவலகத்திற்கு விசாரணைக்காக அழைத்துச் செல்லப்பட்டுள்ளார். அதிமுக ஐடி விங் நிர்வாகி கைது செய்யப்பட்டதற்கு அதிமுக தரப்பில் இருந்து கடும் கண்டனம் எழுந்துள்ளது.