மக்களவைத் தேர்தலுடன் சிக்கிம் மாநிலத்தின் சட்டப் பேரவை தேர்தலும் நடந்து முடிந்துள்ளது. இதையடுத்து அம்மாநிலத்தின் சட்டப்பேரவை தேர்தல் முடிவுகள் கடந்த ஜூன் 2ம் தேதியன்று வெளியானது. இதில் ஆளும் கட்சியான சிக்கிம் கிராந்திகாரி மோர்ச்சா கட்சியே மீண்டும் பெரும்பான்மையான இடங்களைக் கைப்பற்றியுள்ளது.

மொத்தமுள்ள 32 சட்டப்பேரவை தொகுதிகளில் 31 இடங்களை ஆளும் கட்சியான சிக்கிம் கிராந்திகாரி மோர்ச்சா கட்சி கைப்பற்றியது. அம்மாநில எதிர்க்கட்சியான SDF ஒரே ஒரு தொகுதியில் மட்டுமே வென்றுள்ளது. மேலும் பாஜக மற்றும் காங்கிரஸ் ஆகிய தேசிய கட்சிகள் அங்கு ஒரு இடங்களில் கூட வெற்றி பெறவில்லை என்பது குறிப்பிடத்தக்கது.

இந்நிலையில் சிக்கிம் மாநிலத்தின் கேங்டாக்கில் உள்ள பல்ஜோர் ஸ்டேடியத்தில் சிக்கிம் கிராந்திகாரி மோர்ச்சா கட்சியைச் சேர்ந்த முதலமைச்சர் பிரேம் சிங் தமாங் இரண்டாவது முறையாக சிக்கிம் மாநிலத்தின் முதலமைச்சராக இன்று பதவியேற்றுள்ளார். 

இந்த பதவியேற்பு விழாவில் சிக்கிம் மாநில ஆளுநர் லக்ஷ்மன் ஆச்சார்யா கலந்து கொண்டு முதலமைச்சர் பிரேம் சிங் தமாங் மற்றும் அவரது அமைச்சர்களுக்கு பதவிப் பிரமாணம் செய்து, ரகசிய காப்பு பிரமாணமும் செய்து வைத்தார். 

இதையடுத்து முதலமைச்சரின் பதவியேற்பு விழா நிகழ்ச்சிக்காக அங்கு கேங்டாக் முழுவதும் பலத்த  பாதுகாப்பு ஏற்பாடுகள் செய்யப்பட்டு இருந்தன.