சபாநாயகர் அப்பாவு இன்று இரவு ஆஸ்திரேலியா பயணம்!...சால்வை அணிவித்து முதலமைச்சர் மு.க ஸ்டாலின் வாழ்த்து

ஆஸ்திரேலியா நாட்டின் சிட்னி நகரத்தில் நவம்பர் மாதம் 5-ம் தேதி முதல் 8-ம் தேதிவரை 67-வது காமன்வெல்த் நாடாளுமன்ற மாநாடு நடைபெற உள்ளது. இந்த மாநாட்டில் தமிழ்நாடு சட்டசபை சபாநாயகர் அப்பாவு கலந்து கொள்கிறார்.

இதற்காக அவர் இன்று இரவு 11.25 மணிக்கு விமானம் மூலம் சிங்கப்பூருக்கு சென்று அங்கிருந்து மலேசியா நாட்டிற்குச் சென்று, அங்கிருந்து சிட்னி நகரை 5-ம் தேதி சென்றடைய உள்ளார். இந்த மாநாட்டில் கலந்து கொண்ட பிறகு அவர் நியூசிலாந்து நாட்டிற்குச் சென்று விட்டு, நவம்பர் 17-ம் தேதி சென்னை திரும்புகிறார் என்று தமிழக அரசு தெரிவித்து உள்ளது.

இந்த நிலையில், தமிழக அரசு இன்று வெளியிட்டுள்ள அறிக்கையில், முதலமைச்சர் மு.க ஸ்டாலின் மாண்புமிகு சட்டப்பேரவைத் தலைவர் அப்பாவு அவர்களை சந்தித்து, ஆஸ்திரேலியா நாட்டின் சிட்னி நகரில் நடைபெற உள்ள 67ஆவது காமன்வெல்த் பாராளுமன்ற மாநாட்டில் கலந்துகொள்ள செல்வதையொட்டி அவருக்கு சால்வை அணிவித்து வாழ்த்து தெரிவித்தார் என்று குறிப்பிடப்பட்டுள்ளது.