பாஜக மாநில தலைவர் அண்ணாமலை இன்று திமுகவினரின் சொத்து பட்டியல் மற்றும் சில ஊழல் குறித்த தகவல்களையும் வெளியிட்டு உள்ளார். மொத்தமாக ஒரு லட்சம் கோடிக்கு மேல் அதில் திமுகவினரின் சொத்து இருப்பதாக தெரிவித்துள்ளார்.

இதில், டிஆர் பாலு, கனிமொழி, அமைச்சர்கள் துரைமுருகன், கே என் நேரு, வேலூர், அன்பில் மகேஷ், உதயநிதி ஆகியோரின் கோடி கணக்கான  சொத்து பட்டியலை அண்ணாமலை வெளியிட்டு உள்ளார்.

மேலும், தான் வாங்கிய ரஃபேல் வாட்ச் குறித்த விவரங்களையும் அண்ணாமலை சற்று முன்பு வெளியிட்டுள்ளார். அத்ரக்கான ரசிதையும் செய்தியாளர்கள் முன்பு அண்ணாமலை காண்பித்தார்.

இந்நிலையில், இன்று செய்தியாளர்களை சந்தித்த அம்மா மக்கள் முன்னேற்ற கழகத்தின் பொதுச்செயலாளர் டிடிவி தினகரனிடம், அண்ணாமலை வெளியிட்டுள்ள திமுகவின் சொத்து பட்டியல் விவரங்கள், ஊழல் விவரங்கள் குறித்து செய்தியாளர்கள் கேள்வி எழுப்பினர்.

அதற்கு பதில் அளித்த டிடிவி தினகரன், அண்ணாமலையிடம் அதிமுகவினரின் ஊழல் பட்டியல், சொத்து பட்டியல் குறித்த விவரங்களை வெளியிடுவாரா என்று கேளுங்கள் என்று பதில் கேள்வியை எழுப்பி உள்ளார்.

முன்னதாக அண்ணாமலை திமுகவினரின் சொத்து பட்டியலை வெளியிட உள்ளது குறித்து, அண்ணாமலை இடம் தான் நீங்கள் கேட்க வேண்டும் என்று, அதிமுக பொதுச் செயலாளர் எடப்பாடி பழனிசாமி பதிலளித்துள்ளார் என்பது குறிப்பிடத்தக்கது.