இந்தியா - வெஸ்ட் இண்டீஸ் அணிகள் இடையிலான 3-வது ஒருநாள் ஆட்டம், இன்று நரேந்திர மோடி மைதானத்தில் நடந்துகொண்டிருக்கிறது.

இதில் டாஸ் வென்ற இந்திய அணி முதலில் பேட்டிங் செய்ய முடிவு செய்தது. அதன்படி களமிறங்கிய இந்திய தொடக்க ஆட்டக்காரர் ரோஹித் சர்மா 13 ரன்னுக்கும் ஷிக்கர் தவான் 10 ரன்னுக்கும் தங்கள் விக்கெட்டுகளை பறிகொடுத்தனர்.

அதிரடி ஆட்டக்காரரான விராட் கோலி ரன் ஏதும் எடுக்காமல் டக் அவுட் ஆகி வெளியேறினார். அதனைத் தொடர்ந்து ஷ்ரேயாஸ் ஐயர் உடன் கைகோர்த்த ரிஷப் பண்ட் ஜோடி அசத்தலான ஆட்டத்தை வெளிப்படுத்தினர்.

இருவரும் தங்களது அரைசதத்தை கடந்து ஆடியபோது, ரிஷப் பண்ட் 56 ரன்களுக்கு தனது விக்கெட்டை பறிகொடுத்தார். அவரைத் தொடர்ந்து சூர்யகுமார் யாதவ் 6 ரன்னுக்கு தனது விக்கெட்டை இழக்க, மறுமுனையில் ஷ்ரேயாஸ் ஐயர் செஞ்சுரி அடிப்பார் என்று எதிர்பார்த்த நிலையில், 80 ரன்களுக்கு தனது விக்கெட்டை பறிகொடுத்தார்.

இறுதியாக களமிறங்கிய தீபக் சாகர் நிதானமாகவும் ஆடி, 38 ரன்களை சேர்த்தார். தமிழகத்தை சேர்ந்த வாஷிங்டன் சுந்தர் தனது பங்குக்கு நிதான ஆட்டத்தை வெளிப்படுத்தி 33 ரன்களை சேர்த்து ஆட்டமிழந்தார். இறுதியில் இந்திய அணி 50 ஓவர்கள் முடிவில், அனைத்து விக்கெட்களையும் இழந்து 265 ரன்களை சேர்த்தது. 

இதனையடுத்து 266 ரன்கள் எடுத்தால் வெற்றி என்ற இலக்குடன் களமிறங்கிய வெஸ்ட் இண்டீஸ் அணியின் பேட்ஸ்மேன்கள், இந்திய அணியின் பந்துவீச்சை சமாளிக்க முடியாமல் அடுத்தடுத்து தங்களது விக்கெட்டுகளை பறிகொடுத்தனர்.

இதில் நிக்கோலஸ் பூரான் 34 ரன்களையும், ஓடியன் ஸ்மித் 36 ரன்களும் எடுத்து எடுத்து அசத்தினர். இருப்பினும் அவர்களும் தங்களது விக்கெட்டுகளை பறிகொடுத்தனர்.

இந்தியனின் பந்துவீச்சை பொறுத்தவரை பந்துவீசிய 4 வீரர்களும் தலா 2 விக்கெட்டுகளை கைப்பற்றி அசத்தினர். தீபக் சஹர், மோகமத் சிராஜ், ப்ரிசித் கிருஷ்ணா, குல்தீப் யாதவ் தலா 2 விக்கெட்டுகளைக் கைப்பற்றி அசத்தியுள்ளனர்.

தற்போதுவரை வெஸ்ட் இண்டீஸ் அணி 26 ஓவர்களில் 8 விக்கெட்டுகளை இழந்து, 134 ரன்களை மட்டுமே சேர்த்துள்ளது.

ஏற்கனவே இந்த ஒருநாள் தொடரில் இந்திய அணி இரண்டு ஆட்டங்களை வென்று தொடரை வென்று உள்ள நிலையில், இந்த தொடரின் கடைசி ஆட்டமான இந்த ஆட்டத்திலும், இந்திய அணி வெற்றி பெறும் நிலையில் உள்ளது. வெஸ்ட் இண்டீஸ் அணி இந்த ஒருநாள் தொடரில் ஒயிட்வாஷ் ஆகக்கூடிய நிலைமைக்குத் தள்ளப்பட்டுள்ளது.