தஞ்சாவூர் மாவட்டத்தில் உள்ள கும்பகோணம் அருகே கள்ளப்புலியூரில் தனியார் கல்லூரி ஒன்று செயல்பட்டு வருகிறது. இந்த கல்லூரி பேருந்து ஒன்று இன்று காலை கும்பகோணம் மற்றும் அதன் சுற்றுவட்டார பகுதிகளில் இருந்து மாணவர்களை ஏற்றிக்கொண்டு கும்பகோணம் நோக்கி சென்று கொண்டிருந்தது. இந்த பேருந்தில் சுமார் 20 மாணவ-மாணவிகள் பயணம் செய்தனர்.

இந்த நிலையில், கல்லூரி பேருந்து திருவிடைமருதூர் அடுத்துள்ள கோவிந்தபுரம் வழியாக கல்லூரிக்கு சென்று கொண்டிருந்தபோது அந்த வழியாக கும்பகோணத்தில் இருந்து பூ லோடு ஏற்றிக்கொண்டு மயிலாடுதுறை நோக்கி சென்ற மினிலாரி எதிர்பாராத விதமாக கல்லூரி பேருந்தின் மீது பயங்கரமாக மோதி விபத்துக்குள்ளானது. இந்த விபத்தில் மினி லாரியின் முன்பகுதி முழுவதும் நொறுங்கியது.

இந்த விபத்தில் மினி லாரியில் பயணம் செய்த இரண்டு பேரும் சம்பவ இடத்திலேயே பரிதாபமாக உயிரிழந்தனர். மேலும், பேருந்தில் பயணம் செய்த கல்லூரி மாணவர்கள் 20 பேர் படுகாயம் அடைந்தனர். இந்தச் சம்பவம் குறித்து தகவல் அறிந்து சம்பவ இடத்திற்கு வந்த திருவிடைமருதூர் போலீசார் பலியான 2 பேரின் உடல்களை கைப்பற்றி பிரேத பரிசோதனைக்காக கும்பகோணம் அரசு மருத்துவமனைக்கு அனுப்பி வைத்தனர். 

மேலும், படுகாயமடைந்த கல்லூரி மாணவர்களையும் சிகிச்சைக்காக மருத்துவமனைக்கு அனுமதித்தனர். இந்த விபத்துக் குறித்து திருவிடைமருதூர் போலீசார் தீவிர விசாரணை மேற்கொண்டு வருகின்றனர். இந்த சம்பவம் அப்பகுதியில் பெரும் சோகத்தை ஏற்படுத்தியது.