ஈரோடு மாவட்டம் சத்தியமங்கலம் அருகே ரூபாய் 4 லட்சம் மதிப்பிலான போதைப் பொருட்களை பறிமுதல் செய்த போலீசார் மூன்று பேரை கைது செய்தனர்.

ஈரோடு மாவட்டம் சத்தியமங்கலம் போலீசார் மற்றும் தனிப்பிரிவு போலீசார் இணைந்து நள்ளிரவில் ரோந்து பணியில் ஈடுபட்டனர். அப்பொழுது ஒரு மணியளவில் இரண்டு மோட்டார் சைக்கிளில் வந்த மூன்று பேரை தடுத்து நிறுத்தி விசாரணை செய்தனர். இதைத்தொடர்ந்து போலீசார் சந்தேகத்தின் அடிப்படையில் மோட்டார் சைக்கிளில் சோதனை செய்ததில், தமிழக அரசால் தடை செய்யப்பட்ட கஞ்சா, பான் மசாலா, விமல் பாக்கு, கூல்லிப் போன்ற போதை பொருட்களை விற்பனைக்காக கடத்தி வந்தது கண்டுபிடிக்கப்பட்டது.

மேலும் அவர்களிடம் விசாரணை நடத்தியத்தில், புதுக்கோட்டை மாவட்டம் கட்டுமாவடி பகுதியைச் சேர்ந்த அபூபக்கர் (50), அம்மாபட்டினம் வடக்கு தெருவை சேர்ந்த முகமது இட்ரோஸ்(27) மற்றும் மணல்குடி வடக்கு தெருவை சேர்ந்த ஷேக் அப்துல்லா அகமது(27) என்பதும், இவர்கள் மூன்று பேரும் நாமக்கல் மாவட்டத்தில் தங்கி போதை பொருட்கள் விற்பனை செய்து வந்ததும் தெரியவந்தது.

இதைத்தொடர்ந்து அவர்களிடம் இருந்த ரூபாய் 4 லட்சம் மதிப்பிலான 97 கிலோ போதை பொருட்கள் மற்றும் கடத்தலுக்கு பயன்படுத்தப்பட்ட இரண்டு மோட்டார் சைக்கிளையும் பறிமுதல் செய்த போலீசார் மூன்று பேரையும் கைது செய்தனர். இதையடுத்து கைது செய்யப்பட்ட மூன்று பேரிடமும் போதை பொருள் கடத்தல் குறித்து போலீசார் மேலும் விசாரணை நடத்தி வருகின்றனர்.