அத்திக்கடவு திட்டம் தொடர்பாக வருகின்ற ஆகஸ்டு இருபதாம் தேதி முதல், பாஜக சார்பில் தொடர் உண்ணாவிரத போராட்டம் நடத்தப்பட உள்ளதாக, பாஜகவின் மாநில தலைவர் அண்ணாமலை அறிவித்துள்ளார்.

பெருந்துறை அருகே இன்று அத்திக்கடவு - அவிநாசி திட்ட நீரேற்று நிலையத்தை பார்வையிட்ட அண்ணாமலை பின்னர் செய்தியாளர்களை சந்தித்தார். 

அப்போது அவர் தெரிவிக்கையில், அத்திக்கடவு - அவிநாசி  திட்டத்தை முடித்து, விரைந்து பயன்பாட்டுக்கு கொண்டு வர வலியுறுத்தி, வருகின்ற ஆகஸ்டு இருபதாம் தேதி முதல், பாஜக சார்பில் தொடர் உண்ணாவிரத போராட்டம் நடத்தப்பட உள்ளது" என்று அண்ணாமலை தெரிவித்துள்ளார்.

முன்னதாக, இந்தியச் சுதந்திரப் போரில், ஆங்கிலேயர்களை எதிர்த்துப் போரிட்டு வெற்றி கண்டவரும், இறுதி மூச்சு வரை தேச விடுதலைக்காகப் போராடியவருமான மாவீரர் தீரன் சின்னமலை அவர்களது 219 ஆவது நினைவு தினத்தை முன்னிட்டு, ஈரோடு மாவட்டம், ஓடாநிலையில் அமைந்துள்ள தீரன் சின்னமலை மணிமண்டபத்தில் உள்ள அவரது திருவுருவச் சிலைக்கு அண்ணாமலை மலரஞ்சலி செய்து மரியாதை செலுத்தினார்..

மேலும், விடுதலைப் போரில், மாவீரர் தீரன் சின்னமலையுடன் இணைந்து போராடி, தாய்நாட்டுக்காக உயிர்த் தியாகம் செய்த வீரன் குணாளன் நாடார் நினைவு தினத்தை முன்னிட்டு, வெள்ளோட்டில், அவரது திருவுருவப் படத்துக்கு அண்ணாமலை மலரஞ்சலி செய்து, மரியாதை செலுத்தினார்.