ஒரு லட்சத்தை கடந்த அரசு பள்ளி மாணவர்கள் சேர்க்கை; ஒரே நாளில் 08 ஆயிரம் மாணவர்கள் சேர்ப்பு..!

அரசு பள்ளிகளில் மாணவர்களின் சேர்க்கையை அதிகரிக்கும் நோக்கில், பல்வேறு முயற்சிகள் பள்ளிக்கல்வித் துறை சார்பில் மேற்கொள்ளப்பட்டு வருகின்றன. இந்நிலையில், 5 லட்சம் மாணவர் சேர்க்கை என்ற இலக்கை நோக்கி முன்னேற வேண்டும் என்ற அறிவுறுத்தலையும் ஆசிரியர்களுக்கு கல்வித்துறை வழங்கியுள்ளது.

தற்போது, தமிழ்நாடு முழுவதும் உள்ள 37 ஆயிரத்து 553 அரசு பள்ளிகளில் கடந்த 1-ந்தேதி மாணவர் சேர்க்கை தொடங்கியது. இத்யனை, முதலமைச்சர் மு.க.ஸ்டாலின் மற்றும் துணை முதலமைச்சர் உதயநிதி ஸ்டாலின் ஆகியோர் தொடங்கி வைத்தனர். அதனை தொடர்ந்து, அரசு பள்ளிகளிலும் மாணவர் சேர்க்கை விறுவிறுப்பாக நடைபெற்று வருகிறது.

இந்நிலையில், கடந்த 1-ந்தேதி முதல் இன்று வரையிலான 20 நாட்களில் வந்த 14 வேலை நாட்களில் மாணவர் சேர்க்கை ஒரு லட்சத்தை கடந்துள்ளதாக கூறப்படுகிறது, அதிலும் பெரும்பாலும் 1-ம் வகுப்புக்கு அதிகமான மாணவர் சேர்க்கை நடக்கிறது.

அத்துடன், இன்று ஒரே நாளில் மட்டும் 08 ஆயிரத்திற்கு மேற்பட்ட மாணவர்கள் சேர்ந்துள்ளனர் என்றும் மொத்தம் 01 லட்சத்து 06 ஆயிரத்து 268 மாணவர்கள் சேர்ந்துள்ளதாகவும் பள்ளிக்கல்வித்துறை தெரிவித்துள்ளமை குறிப்பிடத்தக்கது.