மணி ரத்னத்தின் பிரபலமான திரைப்படமான ‘பாம்பே’ வெளியானதை 30 ஆண்டுகள் கடந்துள்ள நிலையில், அந்தப் படத்தின் ஒளிப்பதிவாளராக பணியாற்றிய ராஜீவ் மேனன் அளித்த பேட்டி, தற்போது சமூக ஊடகங்களில் சர்ச்சையை ஏற்படுத்தியுள்ளது.

O2 இந்தியா தொலைக்காட்சிக்கு அளித்த பேட்டியில், ராஜீவ் மேனன் கூறியதாவது:“இன்றைய சூழலில் ‘பாம்பே’ போன்ற ஒரு படத்தை எடுக்கவே முடியாது. மக்கள் மிகவும் தீவிரமான நிலைப்பாடுகளை எடுத்துக் கொள்கிறார்கள். மதம் ஒரு பெரிய பிரச்சினையாக மாறிவிட்டது. அந்த மாதிரியான ஒரு படம் வெளியாகும் பொழுது சிலர் தியேட்டர்களுக்கே தீ வைக்கக்கூடும். கடந்த 25-30 ஆண்டுகளில் இந்தியாவின் சகிப்புத்தன்மை மிகவும் குறைந்துவிட்டது.”இந்தக் கருத்துகள், சமூக ஊடகங்களில் அதிர்ச்சியையும் விவாதத்தையும் கிளப்பியுள்ளது.

1995ம் ஆண்டு மார்ச் 10-ம் தேதி வெளியான ‘பாம்பே’ திரைப்படம், அரவிந்த் சாமி மற்றும் மனிஷா கொய்ராலா நடித்த காதல் கதையுடன், மும்பை கலவரம் போன்ற நுணுக்கமான அரசியல் நிகழ்வுகளைச் சேர்ந்த கதையாக்கத்தை மையமாகக் கொண்டது. விமர்சன ரீதியாகவும், வசூல் ரீதியாகவும் திரைப்படம் பெரும் வெற்றி பெற்றது.

இந்திய மொழிகளிலும் படமாக்கப்பட்ட இந்தப் படம், சமூக நலனையும், மத ஒற்றுமையையும் வலியுறுத்தும் முயற்சியாக இருந்தது. இப்படம், மணி ரத்னத்தின் அரசியல் த்ரிலஜியின் இரண்டாவது படமாகக் கருதப்படுகிறது. இதற்கு முந்தைய படம் ‘ரோஜா’ (1992), அடுத்ததாக வந்த படம் ‘தில் சே’ (1998).

தற்போது இயக்குனர் மணிரத்னம், 38 ஆண்டுகளுக்குப் பிறகு நடிகர் கமல்ஹாசனுடன் மீண்டும் இணைந்து ‘தக் லைஃப்’ என்ற புதிய திரைப்படத்தை இயக்கி வருகிறார். இதன் வெளியீட்டு தேதி ஜூன் 5 என அறிவிக்கப்பட்டுள்ளது.

இந்தப் படம், ராஜ்கமல் பிலிம்ஸ், மெட்ராஸ் டாக்கீஸ், ரெட் ஜெயன்ட் மூவிஸ் ஆகிய மூன்று நிறுவனங்களின் கூட்டணியில் உருவாகி வருகிறது.முதலில் ஜெயம் ரவி மற்றும் துல்கர் சல்மான் நடித்துள்ளனர் எனக் கூறப்பட்ட போதிலும், தேதி மாறுபாடு காரணமாக அவர்கள் விலகிய நிலையில், சிம்பு மற்றும் அசோக் செல்வன் ஆகியோர் அந்த இடங்களைப் பிடித்துள்ளனர்.
மேலும் த்ரிஷா, அபிராமி, நாசர் உள்ளிட்ட பலர் இதில் நடிக்கின்றனர்.

ராஜீவ் மேனனின் இந்தக் கருத்துகள், பலரை சிந்திக்க வைக்கும் விதமாக உள்ளன. சினிமா ஒரு கலை வடிவம் மட்டுமல்ல, சமூகத்தை பிரதிபலிக்கும் கண்ணாடி என்று கருதப்படுவதால், சமூகத்தின் சகிப்புத்தன்மை குறைவது குறித்து வந்த இந்தக் கருத்து, நவீன இந்தியாவின் சுதந்திரத்தையும் விவாதத்தையும் கேள்விக்குள்ளாக்குகிறது.