கனமழை எதிரொலி: பள்ளி, கல்லூரிகளுக்கு விடுமுறை!

வடகிழக்கு பருவமழை காரணமாக இன்று தமிழகத்தில் கன மழை பெய்ய வாய்ப்பு உள்ளதாக இந்திய வானிலை ஆய்வு மையம் எச்சரிக்கை விடுத்துள்ளது.

மேலும் ஆரஞ்சு அலாட் விதிக்கப்பட்டிருந்தது. அதன்படி பல்வேறு மாவட்டங்களிலும் நேற்று இரவில் இருந்து கனமழை பெய்து வருகிறது.

இன்று காலை முதல் இடி மின்னலுடன் கனமழை பெய்து வருவதால் தென்காசி, திருநெல்வேலி, திண்டுக்கல், தேனி, மதுரை ஆகிய மாவட்டங்களில் அனைத்து பள்ளிகளுக்கும் விடுமுறை அளிக்க மாவட்ட ஆட்சியர்கள் உத்தரவிட்டனர்.

சிவகங்கை மாவட்டத்திலும் பள்ளிகளுக்கு விடுமுறை அளிக்கப்பட்டுள்ளது. கன மழை காரணமாக மயிலாடுதுறை மாவட்டத்திலும் பள்ளிகள் மற்றும் கல்லூரிகளுக்கு விடுமுறை அளிக்கப்பட்டதாக அந்த மாவட்ட ஆட்சியர் அறிவித்துள்ளார்.

சென்னை மற்றும் அதனை சுற்றியுள்ள பகுதிகளில் கனமழை பெய்து வருவதை தொடர்ந்து சென்னை மாவட்டத்தில் உள்ள பள்ளிகளுக்கும் இன்று விடுமுறை அளிக்கப்பட்டுள்ளது.