தந்தை மற்றும் மகள் இருவரும் இருசக்கர வாகனத்தில் பக்ரீத் பண்டிகைக்காக குர்பாணி கொடுக்க சென்ற போது ஏற்பட்ட விபத்தில் சிறுமி பலி:

மேட்டுப்பாளையம்: கரட்டுமேடு பகுதியை சேர்ந்தவர் சையது முஸ்தபா (வயது 40). இவரது ஒரே மகள் இபான் நசீரா. இவர் அந்த பகுதியில் உள்ள அரசுப்பள்ளியில் 4-ம் வகுப்பு படித்து வந்தார்.

சையது முஸ்தபா மற்றும் மகள் இபான் நசீரா இருவரும் நேற்று பக்ரீத் பண்டிகை என்பதால் குர்பானி கொடுப்பதற்காக சென்று விட்டு, இருசக்கர வாகனத்தில் அன்னூர் சாலை வழியாக வந்து கொண்டிருந்தனர். 

அன்னூர் அடுத்து டேங்குமேடு பகுதியில் உள்ள நேசனல் பள்ளி வழியாக கரட்டுமேடு சென்று கொண்டிருந்தனர். அப்போது இவர்களுக்கு முன்னாள் சென்ற டிராக்டரை முந்துவதற்காக சையது முஸ்தபா வாகனத்தை வேகமாக ஒட்டியுள்ளார். 

இந்நிலையில் திடீரென இருசக்கர வாகனம் நிலை தடுமாறி கீழே கவிழ்ந்ததால், தந்தை மற்றும் மகள் இருவரும் சாலையில் விழுந்து, சிறுமி இபான் நசீரா மீது டிராக்டரின் பின்சக்கரம் ஏறி இறங்கியதில் சம்பவ இடத்திலேயே சிறுமி பரிதாபமாக உயிரிழந்தார்.

தந்தை சையது முஸ்தபா லேசான காயத்துடன் உயிர் தப்பினார். இச்சம்பவம் அறிந்து விரைந்து வந்த மேட்டுப்பாளையம் காவலர்கள் சிறுமியின் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். 

மேலும், போலீசார் இது குறித்து வழக்குப்பதிவு செய்து விசாரணை நடத்தி வருகின்றனர். குர்பானி கொடுப்பதற்காக சென்ற சிறுமி உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.