திருவண்ணாமலை மாவட்டத்தில் உள்ள செய்யாறு காந்திசாலை காமராஜர் நகர் பகுதியை சேர்ந்தவர்கள் அல்தாப் தாசிப்-சப்ரின் பேகம் தம்பதியினர். இவர்களது மகள் அல்வினா மரியம். இவர்களில் அல்தாப் தாசிப் தனியார் நிதிநிறுவனம் மூலம் தீபாவளி பண்டிகை சீட்டு, நகை சேமிப்பு திட்டம், மளிகை சாமான்கள் வழங்கும் திட்டங்களை நடத்தி அதன் மூலம் கோடிக்கணக்கில் பணமோசடி செய்ததாக திருவண்ணாமலை பொருளாதார குற்றப்பிரிவில் வழக்கு நிலுவையில் உள்ளது. 

ஆனால், அல்தாப் தாசிப் தற்போது நீதிமன்றத்தில் ஜாமீனில் வெளியே வந்துள்ளார். இதற்கிடையே மேலாளராக வேலை பார்த்து வந்த ராணிப்பேட்டை மாவட்டம் வாலாஜாபேட்டை பகுதியை சேர்ந்த வசந்தகுமார் அல்தாப் தாசிப் குடும்பத்தினரை கார் மூலம் செல்ல வேண்டிய இடங்களுக்கு அழைத்து சென்று வந்துள்ளார்.

அதன் படி நேற்று சப்ரின்பேகம், மற்றும் அவரது மகள் அல்வினா மரியம் ஆகிய இருவரை சென்னையில் உள்ள அவரது அக்காள் வீட்டிற்கு கார் மூலம் அழைத்துச் செல்வதற்காக வந்தார். இருவரையும் காரில் ஏற்றிக்கொண்டு சென்ற அவர், திடீரென வேலூர் நோக்கி சென்றதோடு அங்கு அவருக்கு தெரிந்த நண்பர்களை வரவழைத்து அவர்கள் மூலம் இருவரையும் சிறை பிடித்துள்ளார்.

பின்னர் சப்ரின் பேகத்தின் தாயார் ஹயாத்தின் பேகத்தை வாட்ஸ் அப் மூலம் தொடர்பு கொண்டு முதலில் ரூ.1 கோடி வரை பணம் கேட்டுள்ளனர். தொடர்ந்து ரூ.50 லட்சம் தருமாறும், முதற்கட்டமாக 10 லட்சம் ரூபாயை உடனடியாக வழங்க வேண்டும் என்றும் கூறியுள்ளார். 
இதைக்கேட்டு பதறிப்போன ஹயாத்தின் பேகம் ராணிப்பேட்டை போலீசில் புகார் அளித்தார்.

இதையடுத்து போலீசார் தாய் மற்றும் மகளை கடத்தி சென்றவர்களை பணம் தர தயாராக உள்ளதாக கூறி அந்தப் பணத்தை ராணிப்பேட்டையில் பெற்றுக் கொள்ளுமாறு கூறியுள்ளனர். உடனே அந்தப் பணத்தை பெற்றுக் கொள்வதற்காக, சிலர் வந்துள்ளனர். அவர்களை போலீசார் கையும், களவுமாக பிடித்தனர்.

தொடர்ந்து அவர்களிடம் நடத்திய விசாரணையின் படி கடத்தலில் ஈடுபட்ட 7 பேர் கொண்ட கும்பபலை கைது செய்து காவல் நிலையத்துக்கு அழைத்து வந்து விசாரணை நடத்தி வருகின்றனர். மேலும் கடத்தலுக்கு பயன்படுத்திய 2 கார்களை பறிமுதல் செய்தனர். மேலும், ஒரு ஓட்டலில் அடைத்து வைக்கப்பட்டு இருந்த தாய், மகளை போலீசார் பத்திரமாக மீட்டனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.