பொதுவாகவே ஊட்டிக்கு சாதாரண நாட்களில் வரும் சுற்றுலா பயணிகள் கூட்டத்தை விட கோடை விடுமுறை சீசனில் வரும் கூட்டம் அதிகமாக இருக்கும். இதனால் போக்குவரத்து நெரிசல் ஏற்படும். 

இந்த நிலையில், சுற்றுச்சூழலை பாதுகாப்பதற்கும், நீலகிரிக்கு சுற்றுலா செல்பவர்களின் எண்ணிக்கையை கட்டுப்படுத்தவும் கடந்த ஆண்டு மே மாதம் 7-ந்தேதி முதல் நீலகிரிக்கு செல்லும் சுற்றுலா வாகனங்களுக்கு இ-பாஸ் நடைமுறை அமலில் இருந்து வருகிறது.

தற்போது, கோடை சீசன் தொடங்க உள்ளதால், திங்கள் முதல் வெள்ளிக்கிழமை வரை வாரநாட்களில் 6 ஆயிரம் சுற்றுலா வாகனங்களும், சனி மற்றும் ஞாயிற்றுக்கிழமை உள்ளிட்ட வார இறுதி நாட்களில் 8 ஆயிரம் வாகனங்களை மட்டுமே அனுமதிக்க வேண்டும் என்று உயர்நீதிமன்றம் கட்டுப்பாடு விதித்து உத்தரவிட்டது.

இந்த கட்டுப்பாடு நேற்று முன்தினம் நள்ளிரவு முதல் அமலுக்கு வந்தது. இதையடுத்து மேட்டுப்பாளையத்தில் இருந்து கல்லாறு மற்றும் கோத்தகிரி வழியாக ஊட்டி செல்லும் வாகனங்கள் இ-பாஸ் பதிவு செய்யப்பட்டுள்ளதா என்று கல்லாறு, குஞ்சப்பனை சோதனை சாவடிகளில் போலீசாரும், வருவாய்த்துறையினரும் சோதனை செய்கிறார்கள். 

இதேபோல் கேரள, கர்நாடக மாநிலங்களின் எல்லையில் உள்ள கூடலூர் நாடுகாணி, சோலாடி, தாளூர், பாட்டவயல், நம்பியார் குன்னு, கக்கநல்லா ஆகிய சோதனை சாவடிகளிலும் சுற்றுலா வாகனங்கள் சோதனை செய்யப்பட்டு இ-பாஸ் பதிவு செய்யாமல் வந்த சுற்றுலா பயணிகளின் வாகனங்களை, ஊட்டிக்கு செல்ல போலீசார் அனுமதி மறுத்து திருப்பி அனுப்பினர்.

இந்த நிலையில் 'இ-பாஸ்' முறையை ரத்து செய்யக்கோரி நீலகிரி மாவட்டம் முழுவதும் வியாபாரிகள் இன்று கடையடைப்பு போராட்டம் நடத்துகிறார்கள். இ-பாஸ் நடைமுறையை முழுமையாக ரத்துசெய்ய வேண்டும் என்பது உள்ளிட்ட 12 அம்ச கோரிக்கைகளை வலியுறுத்தி தமிழக அரசின் கவனத்தை ஈர்க்கும் விதமாக 24 மணி நேர கடையடைப்பு உள்பட பொது வேலைநிறுத்தம் நடைபெறுகிறது.