நேற்று சென்னையில், தஞ்சாவூர் தமிழ் பல்கலைக்கழகத்தின் முன்னாள் துணைவேந்தர் அவ்வை நடராஜன் வயது மூப்பின் காரணமாக உயிரிழந்தார். 

இவர் 1936 ஆம் ஆண்டு திருவண்ணாமலை மாவட்டத்தில் உள்ள செய்யாறு எனும் ஊரில் பிறந்து, மதுரை தியாகராசர் கல்லூரியில் தமிழில் முதுகலை பட்டம் பெற்றார்.

இதைத்தொடர்ந்து, சென்னை பச்சையப்பன் கல்லூரியில் "சங்க இலக்கியத்தில் பெயரிடு மரபு" என்னும் தலைப்பில் ஆய்வு செய்து 1958ஆம் ஆண்டில் ஆய்வியல் நிறைஞர் பட்டம் பெற்றார். 

அதன் பின்னர் "சங்க காலப் புலமைச் செவ்வியர்" என்னும் தலைப்பில், ஆய்வு செய்து முனைவர் பட்டம் பெற்றார். இவர் 1992 முதல் 1995 வரை தஞ்சாவூர், தமிழ்ப் பல்கலைக்கழகத்தின் துணைவேந்தர் பொறுப்பு வகித்தார். 

அதன் பிறகு, கடந்த 2014 ஆம் ஆண்டில் செம்மொழித் தமிழாய்வு மத்திய நிறுவனத்தில் துணைத்தலைவராக இருந்தார். மேலும், இவருக்கு கடந்த 2011ம் ஆண்டு  மத்திய அரசு நாட்டின் நான்காவது உயரிய விருதான பத்ம ஸ்ரீ விருதை வழங்கி கவுரவித்தது.

இந்நிலையில், இவரின் மறைவுக்கு பல்வேறு அரசியல் கட்சி தலைவர்கள் மற்றும் பேராசிரியர்கள் என்று பலர் இரங்கல் தெரிவித்து வருகின்றனர். இதையடுத்து, சென்னை அண்ணா நகர் இல்லத்தில் வைக்கப்பட்டுள்ள இவரின் உடலுக்கு தமிழகத்தின் முதலமைச்சர் மு.க.ஸ்டாலின் நேரில் சென்று அஞ்சலி செலுத்தி, அவரது குடும்பத்தினருக்கும் ஆறுதல் தெரிவித்துள்ளார். அப்போது முதல்வருடன் கவிஞர் வைரமுத்து உடன் இருந்தார்.