சென்னை: தமிழக பாஜக முன்னாள் தலைவர் தமிழிசை சௌந்தரராஜன், மகாகவி பாரதியாரின் பிறந்தநாளை முன்னிட்டு, திருவல்லிக்கேணி பாரதியார் இல்லத்தில் உள்ள அவரது சிலைக்கு மலர் தூவி மரியாதை செலுத்தினார். இதனைத் தொடர்ந்து செய்தியாளர்களை சந்தித்த அவர், தமிழக அரசின் செயல்பாடுகள் குறித்தும், அதானி விவகாரம் தொடர்பாகவும் கருத்து தெரிவித்தார்.

தமிழகத்தில் பெண்களுக்கு எதிரான குற்றங்கள் அதிகரித்து வருவதை சுட்டிக்காட்டிய தமிழிசை, “மனநலம் பாதிக்கப்பட்ட பெண் பாலியல் துன்புறுத்தலுக்கு ஆளான நிலையில், குற்றவாளிகள் மீது நடவடிக்கை எடுக்காத சூழ்நிலை உள்ளது. மத்திய தணிக்கை அறிக்கையின் அடிப்படையில், பெண்களுக்கான நிதி ஒதுக்கீட்டில் தமிழ்நாடு அரசு தோல்வி அடைந்துள்ளது. இதற்கான தனி பிரிவே இல்லாமல் இருப்பது கவலைக்குரியது,” என குற்றம்சாட்டினார்.

கொரோனா நிதி குறித்து அவர், “தமிழக அரசு, கொரோனாவுக்காக மத்திய அரசால் ஒதுக்கப்பட்ட ரூ.256 கோடியை முழுமையாக பயன்படுத்தவில்லை. 3,575 ஆக்ஸிஜன் செரிவூட்டிகளில் 167 மட்டும் பயன்படுத்தப்பட்டுள்ளது. இது மிகுந்த வருத்தத்திற்குரியது. இந்த தவறுகளை அரசு சரிசெய்ய வேண்டும்,” என வலியுறுத்தினார்.

அதானி விவகாரம் தொடர்பாக கேள்விகள்

அதானி விவகாரம் தொடர்பாக தமிழிசை, “முதல்வர், அதானியை சந்திக்கவில்லை என்று கூறுகிறார். துணை முதல்வர் உதயநிதி, அதானிக்கும் தமிழக அரசுக்கும் தொடர்பு இல்லை என விளக்கமளிக்கிறார். ஆனால், முதல்வரின் குடும்பத்தினர் அதானியை சந்தித்தனரா? அது தொடர்பான உறுதிப்படுத்தல் தேவை,” என கேள்வி எழுப்பினார்.

பெண்களுக்கு இடஒதுக்கீடு: பாஜக முன்னுதாரணம்

தமிழிசை மேலும், “பாஜகவில் 33% இடஒதுக்கீடு நிர்வாகத்தில் வழங்கப்பட்டுள்ளது. இதேபோல் அனைத்து கட்சிகளிலும், நாடாளுமன்றத்திலும் பெண்களுக்கு இடமளிக்க வேண்டும் என்பது நமது நிலைப்பாடு,” எனத் தெரிவித்தார்.

தமிழக அரசை குற்றம்சாட்டிய அவர், “மத்திய அரசு ஒதுக்கப்படும் நிதியை சரியாக பயன்படுத்த முடியாத சூழல் இருக்கிறது. மத்திய அரசின் திட்டங்களுக்கு தமிழக அரசு ஒத்துழைக்காததாலும் மக்கள் பாதிக்கப்படுகிறார்கள்,” என்றார்.

தமிழிசையின் இந்த கருத்துக்கள், அதானி விவகாரத்தில் புதிய கேள்விகளை எழுப்புவதோடு, தமிழக அரசின் செயல்பாடுகளைப் பற்றி அரசியல் களத்தில் புதிய விவாதத்தை தொடங்கியுள்ளன.