மதுரை மாவட்டம் கருப்பாயூரணி கணேஷ்நகரை சேர்ந்தவர் தனசேகரன் மனைவி பூங்கொடி. இவர் அண்ணாநகர் பகுதியில் உள்ள ஒரு ஏ.டி.எம். மையத்தில் பணம் எடுக்க சென்றபோது அங்குள்ள எந்திரத்தில் கோளாறு ஏற்பட்டதால் பணம் எடுக்க முடியவில்லை. அப்போது அவருக்கு பின்னால் நின்ற இளம்பெண் பூங்கொடியின், ஏ.டி.எம். கார்டை வாங்கி பணம் எடுக்க உதவுவதாக கூறிவிட்டு, பணம் எடுக்க முடியவில்லை என்று கூறி வேறு ஒரு ஏ.டி.எம். கார்டை அவரிடம் கொடுத்துவிட்டு அங்கிருந்து சென்றுவிட்டார்.

அதன் பின்னர் பூங்கொடியின் வங்கிக்கணக்கில் இருந்து ரூ.53 ஆயிரம் எடுக்கப்பட்டதாக குறுஞ்செய்தி வந்தது. அப்போது தான், அந்த இளம்பெண், தன்னிடம் கொடுத்தது வேறு ஏ.டி.எம். கார்டு என்பதும், அந்த பெண் தனது கார்டை பயன்படுத்தி பணம் எடுத்ததும் பூங்கொடிக்கு தெரியவந்தது. உடனே இந்த குறித்து அண்ணாநகர் போலீசில் புகார் அளிக்கப்பட்டது. அதன் பேரில் போலீசார் வழக்குப்பதிவு செய்து அங்குள்ள கண்காணிப்பு கேமராவை ஆய்வு செய்தனர்.

அதில், தேனி மாவட்டம் ஆண்டிப்பட்டி கொண்டமநாயக்கன்பட்டியை சேர்ந்த ராஜேஷ்கண்ணன் மனைவி மணிமேகலைதான், பூங்கொடியிடமும் கைவரிசை காட்டி இருப்பது தெரியவந்தது. மேலும், அவர் மீது ஏ.டி.எம். மைய பணமோசடி தொடர்பாக 17 வழக்குகள் இருப்பதும் தெரியவந்தது.

இதைத் தொடர்ந்து போலீசார் அவரது ஊருக்கு விரைந்து சென்று மணிமேகலையை கைது செய்தனர். பின்னர், அவரை மதுரை மாவட்ட நீதிமன்றத்தில் நேற்று ஆஜர்படுத்தினர். அப்போது நீதிபதி, அவரை மதுரை மத்திய சிறையில் அடைக்குமாறு உத்தரவிட்டார். மேலும், அவருக்கு மருத்துவ பரிசோதனை செய்தவற்காக மதுரை அரசு மருத்துவமனைக்கு அழைத்து சென்றனர். 

பரிசோதனை முடிந்தவுடன் மணிமேகலையை போலீசார் மதுரை பெண்கள் சிறைக்கு அழைத்து வந்தனர். அங்கு அவர் தனது உடையை மாற்றி வருவதாக குளியலறைக்கு சென்றார். அதன் பின்னர் அவர் வெளியே வரவில்லை. இதையடுத்து போலீசார் உள்ளே சென்று பார்த்த போது மணிமேகலை சிறையில் இருந்து தப்பிச் சென்றது தெரியவந்தது. உடனே இந்த சம்பவம் தொடர்பாக உயர் அதிகாரிகளுக்கும், அனைத்து போலீசாருக்கும் தகவல் தெரிவிக்கப்பட்டது.

அதன் பேரில் போலீசார் மதுரை பேருந்து நிலையம், ரெயில்நிலையம் உள்ளிட்ட பல்வேறு பகுதியில் தீவிர தேடுதல் வேட்டை நடத்தி திருமங்கலம் அருகே மணிமேகலையை சுற்றி வளைத்து பிடித்தனர். மீண்டும் அவரை மதுரை மத்திய சிறையில் அடைத்தனர். இந்த சம்பவத்தால் பரபரப்பு ஏற்பட்டுள்ளது.