இயக்குனர் ராம் கங்கையா இயக்கத்தில் வெளியாக இருக்கும் படம் தண்டட்டி. பிரின்ஸ் பிக்சர்ஸ் சார்பில் லக்ஷ்மன் குமார் தயாரிப்பில் வெங்கடேஷ் இணைந்து தயாரித்துள்ள இந்த படத்தில் நடிகர் பசுபதி கதாநாயகனாக நடிக்கிறார்.

ரோகினி, விவேக் பிரசன்னா, அம்மு அபிராமி, தீபா, செம்மலர் அன்னம் என பல நடிகர்கள் முக்கியமான கதாபாத்திரத்தில் நடித்திருக்கின்றனர்.கேஎஸ் சுந்தரமூர்த்தி இசையில், மகேஷ் முத்துசாமி ஒளிப்பதிவு செய்ய படம் திரைக்கு வர இருக்கிறது.

வருகின்ற 23ஆம் தேதி வெளியாகும் இந்த படத்தின் இசை வெளியீட்டு விழா சென்னையில் நடைபெற்றது. படத்தின் டிரைலரை நடிகர் பசுபதி வெளியிட்டார். தண்டட்டி அணிந்தபடி பாட்டிகள் ட்ரெய்லரை பெற்றுக் கொண்டனர்.

இதில் கலந்துகொண்டு பேசிய பசுபதி, இயக்குனர் பா.ரஞ்சித் இயக்கத்தில் வெளியாகிய சார்பட்டா பரம்பரை படப்பிடிப்பு முடிவிற்குப் பிறகு இந்த படத்தின் கதையை கேட்டேன். மிகவும் பிடித்து விட்டது.

எனக்கு எப்போதும் என் பாட்டியின் தண்டட்டியின் மீது ஒரு ஈர்ப்பு. ஆனால் அவர் இருக்கும் வரை அது எனக்கு கிடைக்கவில்லை. அவர் இறந்த பின் சில நாட்களுக்குப் பிறகுதான் என் கையில் கிடைத்தது. இந்த படத்தில் நானும் ரோகிணியும் இணைந்து நடித்திருந்தால் கூட இருவரும் பேசிக் கொள்ளும்படி எந்த விதமான சூழ்நிலைகளும் இல்லை.

இருந்தாலும் படப்பிடிப்பு தளத்தில் மிகவும் கலகலப்பாக உணர்ந்தேன். பாட்டிகளின் அட்டகாசம் சிறப்பாக இருந்தது . அவர்களுக்கு நன்றியை தெரிவித்துக் கொள்கிறேன் இவ்வாறு அவர் கூறினார்.

அவரைத் தொடர்ந்து இயக்குனர் ராம் சங்கையா பேசினார். அவர் பேசியதாவது; இந்த படத்தை எடுக்க வேண்டும் என்று முடிவு செய்த பிறகு என் மனதில் தோன்றியவர்கள் இரண்டு பேர் தான். ஒன்று மம்முட்டி மற்றொன்று நடிகர் பசுபதி. மம்முட்டியை பிடிக்க முடியவில்லை, பசுபதி கிடைத்துவிட்டார்.

இந்த படத்தின் காட்சிகளை படப்பிடிப்பு செய்யும் போது பல்வேறு தடைகள் ஏற்பட்டது. படத்தின் ஆரம்ப நாட்களில் வீடு தேடி அலைந்தபோது ஒரு வீடு கிடைத்தது அந்த வீட்டில் திருமணம் வைத்திருந்தார்கள். இருந்தாலும் வீடு கொடுத்தார்கள்.

ஆனால் காலப்போக்கில் ஒப்பாரி காட்சிகளை படத்தில் வைக்கும் போது வீடு தர மறுத்து விட்டனர் .அவர்கள் வீட்டில் படப்பிடிப்பு நடத்த மறுத்துவிட்டனர். திருமணம் நடக்க இருக்கும் வீட்டில் இந்த மாதிரி ஒப்பாரி காட்சிகளை வைக்கக்கூடாது , என்று கூறியதாக அவர் கூறினார்.