கேரளாவில் ஹேமா தலைமையிலான கமிட்டி அறிக்கை வெளியானதை அடுத்து பல முக்கிய நடிகர்கள், இயக்குநர்கள்,  தயாரிப்பாளர்கள் மீது பாலியல் குற்றச்சாட்டுகள் குவிந்துவருகின்றன. நடிகைகள் குற்றம் சாட்டியவர்களின் மீது போலீஸாரும் வழக்குப்பதிவு செய்துவருகின்றனர். 

இந்த பாலியல் புகார்,  நடிகர் சங்கத்தில் உள்ள சிலர் மீதும் குற்றச்சாட்டு எழுந்ததால் மலையாள நடிகர் மற்றும் சங்க தலைவர் மோகன்லால் உள்பட நிர்வாகிகள் நேற்று முன்தினம் தங்கள் பதவியை ராஜினாமா செய்தனர். இதற்கிடையே பாதிக்கப்பட்ட நடிகைகள் மற்றும் பெண்கள் அரசு அமைத்த சிறப்பு விசாரணை குழுவிடம் ரகசியமாக வாக்குமூலம் அளித்து வருகின்றனர்.

இந்த வரிசையில், படத்தில் வாய்ப்பு தருவதாகக் கூறி பாலியல் தொல்லை அளித்ததாக மலையாள திரையுலகின் பிரபல நடிகரும், இயக்குநருமான பாபுராஜ் மீது பாலியல் வன்கொடுமை வழக்குப்பதிவு செய்யப்பட்டிருக்கிறது. இடுக்கி மாவட்டத்தில் உள்ள அடிமாலி போலீஸ் நிலையித்தில் துணை நடிகை ஒருவர் புகார் அளித்துள்ளார்.

மேலும், மலையாள திரையுலகில் நடிகர் பாபுராஜ் மட்டுமல்லாது நடிகர்கள் சித்திக், முகேஷ், ஜெயசூர்யா, மணியன்பிள்ளை ராஜு, எடவேல பாபு, இயக்குநர் ரஞ்சித் ஆகியோர் மீதும் பாலியல் வழக்குகள் பதிவு செய்யப்பட்டிருக்கின்றன என்பது குறிப்பிடத்தக்கது.