பிரபல தொழிலதிபரான லெஜண்ட் சரவணன் 'தி லெஜண்ட்' படத்தின் மூலம் நடிகராக அறிமுகமாகி இருக்கிறார். இப்படத்தின் ஆடியோ மற்றும் ட்ரெய்லர் வெளியீட்டு விழா சென்னையில் நேற்று பிரம்மாண்டமாக நடைபெற்ற நிலையில், லெஜண்ட் சரவணன் தான் நிச்சயமாக இரண்டாவதாக ஒரு படத்தில் நடிப்பேன் என்று கூறியுள்ளார். 

ஊர்வசி ரவுடேலா உள்ளிட்ட பிரபல நடிகைகள் இந்த இசை வெளியீட்டு விழாவில் சிறப்பு விருந்தினர்களாக கலந்து கொண்டனர். இந்த நிலையில் 'தி லெஜண்ட்' ஒரு பான் இந்தியா வெளியீடாக இருக்கும் என்று தெரிவிக்கப்பட்டுள்ளது.

இந்த படத்தின் வெளியீட்டு தேதி குறித்து தயாரிப்புக்குழு எந்தவித அறிவிப்பும் இதுவரை வெளியிடவில்லை. தொடர்ந்து பிரபல இரட்டையர்களான ஜேடி - ஜெர்ரி இயக்கிய தி லெஜண்ட் படத்தில் கதாநாயகியாக உர்வசி ரவுடேலா நடித்திருக்கிறார்.

மேலும் படத்தின் முக்கிய கதாபாத்திரங்களில் ரோபோ ஷங்கர், யோகி பாபு, பிரபு, நாசர், மயில்சாமி, சிங்கம்புலி போன்ற பல முக்கிய நட்சத்திரங்கள் இணைந்து நடித்துள்ளனர். மூன்று வருட இடைவெளிக்கு பின் இந்த படத்தில் ஹாரிஸ் ஜெயராஜ் இசையமைத்துள்ளார்.இப்படத்தில் இடம்பெற்றுள்ள மோசலோ மோசலு என்ற முன்பே யூடியூப் பக்கத்தில் வெளியாகி ஒரு கோடிக்கும் அதிகமான பார்வையாளர்களால் பார்க்கப்பட்டுள்ளது. அந்த பாடலை பா.விஜய் எழுதியிருந்த நிலையில், மற்றொரு பாடலை படக்குழு யூடியூப் தளத்தில் சில தினங்களுக்கு முன்னதாக வெளியிட்டது.

வாடிவாசல் என தொடங்கும் இந்த பாடலை சினேகன் எழுதியுள்ளார். ஜோனிடா காந்தி, பென்னி தயால் ஆகியோர் இணைந்து இப்பாடலை பாடியுள்ளனர். 

சென்னையில் பிரமாண்டமாக அரங்கங்கள் அமைக்கப்பட்டு துவங்கப்பட்ட இந்த படத்தின் படப்பிடிப்பு இமயமலை, பொள்ளாச்சி, கும்பகோணம் போன்ற இடங்களில் நடைபெற்றது. இந்த படத்தின் டிரெய்லர் சமீபத்தில் வெளியான நிலையில், லெஜண்ட் சரவணன் இப்படத்தில் விஞ்ஞானியாக நடித்துள்ளார் என்று தெரிவிக்கப்பட்டுள்ளது. 

இந்த நிலையில் 'தி லெஜன்ட்' படத்தின் ட்ரெய்லர் யூடியூப்பில் 25 மில்லியனுக்கும் மேலாக பார்வையாளர்களை பெற்று புதிய சாதனையை படைத்துள்ளது. இந்த சாதனையின் மூலம் நேர்கொண்ட பார்வை பட ட்ரெய்லர் சாதனையை முறியடித்துள்ளது. இதுவரையிலும் நேர்கொண்ட பார்வை 19 மில்லியன் பார்வைகளை மட்டுமே பெற்ற நிலையில், 'தி லெஜன்ட்' டிரெய்லர் சிகரம் தொட்டுள்ளது.