தமிழக முழுவதும் 2748 கிராம உதவியாளர் பணி இடங்கள் நிரப்ப உத்தரவு!

தமிழக முழுவதும் காலியாக உள்ள கிராம உதவியாளர் பணியிடங்களை உடனடியாக நிரப்ப மாவட்ட ஆட்சியர்களுக்கு தமிழக அரசு உத்தரவிட்டுள்ளது. இது குறித்து மாவட்ட ஆட்சியர்களுக்கு வருவாய் நிர்வாக ஆணையர் எஸ்.கே பிரபாகரன் கடிதம் எழுதி உள்ளார்.

அந்த கடிதத்தில் "ஒவ்வொரு மாவட்டத்திலும் கடந்த செப்டம்பர் 3ம் தேதி நிலவரப்படி காலியாக இருக்கும் கிராம உதவியாளர் பணியிடங்களின் எண்ணிக்கை பற்றி தகவல் அளிக்க வேண்டும் என்று கேட்டுக் கொண்டதற்கு இணங்க மாவட்ட ஆட்சியர்கள் அந்த தகவலை அளித்துள்ளனர்.

அதன்படி 01-10-2019 தேதியில் இருந்து 30-09-2022 வரை தமிழக முழுவதும் 2748 கிராம உதவியாளர் பணியிடங்கள் இருப்பதாக தெரியவந்துள்ளது. இந்த காலி பணியிடங்களை விதிகளுக்கு உட்பட்டு உடனடியாக நிரப்ப நடவடிக்கை எடுக்க வேண்டும்.

அரசின் வழிகாட்டுதலின் பின்பற்றி எந்தவித விதிமீரலும் இல்லாமல் கிராம உதவியாளர்கள் பணியிடங்களை நிரப்புமாறு அறிவுறுத்தப்படுகிறது. இதற்காக பெறப்படும் விண்ணப்பங்களை நவம்பர் 14ஆம் தேதி பதிசிலித்து முறையான நேர்காணல் நடத்தி டிசம்பர் 19ம் தேதிக்குள் பணி நியமன ஆணைகளை வழங்கிட வேண்டும்.

மேலும் தேர்வு செய்யப்பட்டவர்களின் பட்டியலை டிசம்பர் 19ஆம் தேதி வெளியிட்டு அன்றைய தினமே பணி ஆணைகளை வழங்க வேண்டும். தற்கான எழுத்துத்திறன் தேர்வை கண்காணிக்க தாலுக்கா அளவில் துணை கலெக்டரை கண்காணிப்பு அதிகாரியாக நியமிக்க வேண்டும். 

கிராமத்தைப் பற்றிய விவரங்கள் அல்லது நில வகைபாடுகள் அல்லது கிராம கணக்குகள் அல்லது மாவட்ட ஆட்சியர் கூறும் தலைப்பு பற்றி 100 வார்த்தைக்கு மிகாமல் கட்டுரை எழுத செய்யலாம். வாசிப்பு திறனை அறிந்து கொள்வதற்காக எந்த ஒரு புத்தகத்திலும் இருந்து ஏதாவது ஒரு பக்கத்தில் உள்ள வாசகங்களை விண்ணப்பதாரரை வாசிக்க சொல்லலாம்.

தாசில்தார்கள் மூலம் தாலுகா அளவில் தேர்ந்தெடுக்கப்படும் ஆட்கள் தேர்வு முறையாக விதிகளை பின்பற்றி நடைபெறுகிறதா என்பதை மாவட்ட ஆட்சியர்கள் உறுதி செய்ய வேண்டும். மேலும் எந்தெந்த தேதியில் கிராம உதவியாளர் தேர்வு நடவடிக்கைகளை மேற்கொள்ளலாம் என்பதையும் அதற்கான விதிகள் வழிகாட்டுதலை தாசில்தார்களுக்கு மாவட்ட ஆட்சியர்கள் சுற்று அறிக்கையாக வழங்க வேண்டும்" இவ்வாறு அந்த கடிதத்தில் குறிப்பிடப்பட்டுள்ளது.

கிராம உதவியாளர் பணிகளுக்கு எந்த ஒரு கல்வித் தகுதியும் குறிப்பிடப்படவில்லை. தமிழ் எழுத படிக்க தெரிந்தால் இந்த பதவிகளுக்கு விண்ணப்பிக்கலாம்.