ஐஐடி விடுதியில் மாணவன் சடலமாக மீட்கப்பட்ட அதிர்ச்சி சம்பவம்!...நள்ளிரவு நேரத்தில் போராட்டத்தில் குதித்த மாணவர்கள்!

அசாம் மாநிலம், கவுகாத்தில் இந்திய தொழில்நுட்ப கழகமான ஐ.ஐ.டி இயங்கி வரும் நிலையில், இங்கு உத்தரபிரதேச மாநிலத்தை சேர்ந்த பிம்லேஷ் குமார் என்ற மாணவன், பிடெக் கம்யூட்டர் சைன்ஸ் 3ம் ஆண்டு பயின்று வந்துள்ளார்.

இந்த நிலையில், நேற்று ஐ.ஐ.டி கல்லூரி விடுதியில் உள்ள அறையில் பிம்லேஷ் பிணமாக மீட்கப்பட்ட சம்பவம் பெரும் அதிர்ச்சியை ஏற்படுத்தியுள்ளது.

இந்த சம்பவம் குறித்து ஐ.ஐ.டி நிர்வாகம் சார்பில் போலீசாருக்கு தகவல் அளிக்கப்பட்டது. தகவலின் பேரில் சம்பவ இடத்திற்கு விரைந்து வந்த போலீசார் பிம்லேசின் உடலை மீட்பு பிரேத பரிசோதனைக்கு அனுப்பி வைத்தனர்.

மேலும், பிம்லேஷ் உயிரிழந்ததற்கான காரணம் இதுவரை வெளியாகாத நிலையில், அவர் கொலை செய்யப்பட்டாரா?, தற்கொலை செய்துகொண்டாரா? அல்லது வேறு ஏதேனும் காரணம் உள்ளதா என்பது குறித்து போலீசார் விசாரணை நடத்தி வருகின்றனர். மேலும் மாணவன் பிம்லேஷ் பிணமாக மீட்கப்பட்ட சம்பவத்தால் கவுகாத்தி ஐ.ஐ.டி. விடுதியில் நள்ளிரவு நேரத்தில் மாணவர்கள் போராட்டத்தில் ஈடுபட்டதால் பரபரப்பான சூழல் நிலவியது.