மத்தியபிரதேச மாநிலத்தில் உள்ள பிடுல் மாவட்டம் சாய்ஹிடா என்ற கிராத்தை சேர்ந்த நபருக்கும் அவரது மனைவிக்கும் அடிக்கடி தகராறு ஏற்பட்டு வந்தது. மது பழக்கம் கொண்ட அந்த நபர் மது குடித்துவிட்டு மனைவியை தாக்கவும் செய்துள்ளார். 

இதையடுத்து,  நேற்று முன் தினம் இரவு கணவன் - மனைவிக்கு இடையே மீண்டும் வாக்குவாதம் ஏற்பட்டுள்ளது. சிலமணி நேரத்திற்குப் பிறகு இந்த வாக்குவாதம் முற்றியது. இதனால், அந்த பெண் தனது அம்மா வீட்டிற்கு சென்றுள்ளார். 

இதனால், கோபமடைந்த பெண்ணின் கணவர் தனது மாமியார் வீட்டிற்கு சென்று, அங்கு தனது மனைவியை கொலை செய்வதற்காக மாமியர் வீட்டின் முன்பு இருந்த இரும்பு கதவின் மீது மின்சார ஒயரை உரசும்படி வைத்து கதவில் மின்சாரத்தை பாய்ச்சியுள்ளார். 

ஆனால், இதற்கு மாறாக மின்சாரம் பாய்ச்சிய அந்த கதவை அந்த நபரின் மாமியார் திறந்துள்ளார். அப்போது, உடலில் மின்சாரம் பாய்ந்து சம்பவ இடத்திலேயே  உயிரிழந்தார். இதை பார்த்துக்கொண்டிருந்த பெண்ணின் கணவர் அங்கிருந்து தப்பியோடிவிட்டார். 

இது குறித்து தகவலறிந்த போலீசார் நிகழ்விடத்திற்கு விரைந்து சென்று, அப்பகுதியில் உள்ள மின் இணைப்பு துண்டிக்கப்பட்ட பின் கதவை திறந்து அந்த பெண்ணை மீட்டு பிரேதபரிசோதனைக்கு அனுப்பிவைத்தனர். 

மேலும், மனைவியை கொலை செய்ய விரித்த வலையில் மாமியார் சிக்கி உயிரிழந்துள்ளார். இதையடுத்து, தப்பியோடிய நபரை போலீசார் தீவிரமாக தேடி வருகின்றனர்.