அரியானா மாநிலத்தில் 90 தொகுதிகளுக்கான சட்டப்பேரவைத் தேர்தல் ஒரே கட்டமாக நடைபெற்றது, இதில் 67.90% வாக்குகள் பதிவு செய்யப்பட்டுள்ளன. இந்த தேர்தலில் சுமார் 2 கோடி வாக்காளர்கள் பங்கேற்றனர்.

கடந்த 10 ஆண்டுகளாக பா.ஜ.க. ஆட்சி நடந்து வரும் அரியானாவில், இம்முறை ஆட்சி மாற்றம் நிகழும் என்ற எதிர்பார்ப்புகள் எழுந்துள்ளன. கருத்துக் கணிப்புகள் காங்கிரஸ் கட்சிக்கே அதிக ஆதரவு இருப்பதாக கூறுகின்றன, எனவே காங்கிரஸ் பெரும்பான்மையுடன் ஆட்சியைக் கைப்பற்றும் வாய்ப்புள்ளது.

இதே நேரத்தில், ஜம்மு-காஷ்மீரில் 90 தொகுதிகளுக்கான தேர்தல் மூன்று கட்டங்களாக கடந்த மாதம் 18, 25, அக்டோபர் 1 ஆகிய தேதிகளில் நடைபெற்றது. மூன்று கட்டங்களிலும் சேர்த்து 63.88% வாக்குகள் பதிவாகியுள்ளது.

ஜம்மு-காஷ்மீருக்கு 2019-ல் சிறப்பு அந்தஸ்து ரத்து செய்யப்பட்ட பிறகு, இந்த சட்டப்பேரவைத் தேர்தல் முக்கியத்துவம் பெற்றது. இங்கு, காங்கிரஸ் தேசிய மாநாட்டுக் கட்சியுடன் கூட்டணி அமைத்து போட்டியிட, பா.ஜ.க. மற்றும் மக்கள் ஜனநாயக கட்சி (PDP) தனித்தனி போட்டியிட்டன.

கணிப்புகள், யாருக்கும் பெரும்பான்மை கிடைக்காமல் தொங்கு சட்டசபை உருவாகும் என்று கூறுகின்றன. இரு மாநிலங்களுக்கான வாக்கு எண்ணிக்கை நாளை நடைபெறவுள்ளது, மற்றும் அதன்பின் தேர்தல் முடிவுகள் அறிவிக்கப்படும். காங்கிரஸ் தலைவர் மல்லிகார்ஜுன கார்கே, அரியானாவில் காங்கிரஸ் தனித்து ஆட்சியமைக்கும், ஜம்மு-காஷ்மீரில் கூட்டணி மூலம் ஆட்சியமைக்கும் என்ற நம்பிக்கையை வெளியிட்டுள்ளார்.