சென்னை மாநகராட்சியில் மண்டலம் வாரியாக பெண்களுக்கு வார்டுகளை ஒதுக்கீடு செய்ய தமிழக அரசு பிறப்பித்த அரசாணையை ரத்து செய்ய வேண்டும் என்று, சென்னை உயர்நீதிமன்றத்தில் வழக்கறிஞர் பார்த்திபன் என்பவர் மனுத்தாக்கல் செய்திருந்தார்.

அவரின் அந்த மனுவில், உள்ளாட்சி அமைப்புகளில் பெண்களுக்கு 50 சதவீதம் இடம்  இடஒதுக்கீடு என்ற சட்டம் 2016-ம் ஆண்டு நிறைவேற்றப்பட்டது. சென்னை மாநகராட்சியில் மண்டலம் வாரியாக பெண்களுக்கு 50 சதவீதம் ஒதுக்கீடு செய்ய முடிவு செய்யப்பட்டு, 200 வார்டுகளில் 105 இடங்கள் பெண்களுக்கு ஒதுக்கீடு செய்யப்படும் வாய்ப்பு உள்ளது. 

இது அரசியல் சட்டத்துக்கு விரோதமானது, எனவே தமிழக அரசின் இந்த அரசாணையை ரத்து செய்ய வேண்டும் என்று குறிப்பிட்டிருந்தார்.

இந்த வழக்கை இன்று விசாரித்த நீதிபதிகள், அரசியலமைப்பு சட்டத்தில் மொத்த இடங்களில் எண்ணிக்கையின் அடிப்படையில்தான் பெண்களுக்கு இட ஒதுக்கீடு வழங்க வேண்டும் என்பதால், அரசியலமைப்பின் சட்டத்தை மீறக்கூடாது. இதனடிப்படையில் மண்டல வாரியான ஒதுக்கீடு செய்யும் தமிழக அரசின் இந்த அரசாணை ரத்து செய்யப்படுவதாக நீதிபதிகள் உத்தரவிட்டனர்.

மேலும், "பெண்களுக்கு பாதி இடஒதுக்கீடு என்பதை மனுதாரர் எதிர்க்கவில்லை. எனவே, 50 சதவீத இட ஒதுக்கீடு அடிப்படையில் தேர்தல் நடத்திக்கொள்ளலாம். ஆனால் மொத்த வார்டுகளில் அடிப்படையில் தான் இந்த இட ஒதுக்கீடு இருக்க வேண்டும்" என்று நீதிபதிகள் உத்தரவிட்டு இந்த வழக்கை முடித்து வைத்தனர்.