அருணாச்சல பிரதேசத்தில் உள்ள இடங்களுக்கான சீனப் பெயர் பட்டியலை சீனா வெளியிட்டு இருப்பதற்கு, காங்கிரசை கட்சியின் பொதுச் செயலர் ஜெய்ராம் ரமேஷ், எம்.பி., கண்டனம் தெரிவித்துள்ளார். 

இதுகுறித்த அவரின் அறிக்கையில், "இந்தியா-சீனா எல்லை தற்போது "நிலையானதாக" இருப்பதாக சீன உயர்மட்ட தூதர் ஒருவர் சமீபத்தில் கூறினார். 

ஆனால், சீனாவின் ஆத்திரமூட்டல்களும், அத்துமீறல்களும் தொடர்கின்றன. 2017 மற்றும் 2021 ஆம் ஆண்டுகளில் அருணாச்சல பிரதேசத்தில் உள்ள இடங்களுக்கான சீனப் பெயர்களின் மூன்றாவது தொகுப்பை தற்போது வெளியிட்டுள்ளது.

2020 ல் பிரதமர் மோடி செய்த தவறுக்கு நாம் இப்போது விலை கொடுத்து கொண்டு இருக்கிறோம். ஏறக்குறைய மூன்று ஆண்டுகளுக்குப் பிறகு, சீனப் படைகள் நமது ரோந்துப் படைகளுக்கு முன்னர் தடையின்றி அணுகக்கூடிய நிலை அருணாச்சல பிரதேசத்தில் உருவாகி இருந்தது.

ஆனால் இதனை மத்திய அரசு மறுத்து வருகின்றது. இப்போது அருணாச்சல பிரதேசத்தில் உள்ள நிலையை சீர்குலைக்க சீனர்கள் முயற்சிக்கின்றனர்.

அருணாச்சலப் பிரதேசம் எப்போதும் இந்தியாவின் ஒருங்கிணைந்த மற்றும் பிரிக்க முடியாத பகுதியாக இருந்து வருகிறது. அருணாச்சல பிரதேச மக்கள் இந்தியாவின் பெருமை மற்றும் தேசபக்தியுள்ள குடிமக்கள். 

இந்த உண்மைகள் எந்த வகையிலும் சீர்குலைக்கப்படாமல் இருப்பதை உறுதிசெய்வதில் இந்தியா மற்றும் அனைத்து இந்தியர்களின் கூட்டு உறுதியில் எந்த சந்தேகமும் இல்லை" என்று அந்த அறிக்கையில் ஜெய்ராம் ரமேஷ் தெரிவித்துள்ளார்.