கடலூர் மாவட்டம் அதர்நத்தம் கிராமத்தில் விடுதலைச் சிறுத்தைகள் கட்சி நிர்வாகியான மேற்கு மாவட்ட பொருளாளர் செல்வத்தின் விளைநிலத்தில், வாடகைக்கு எடுத்த நபர்கள் கள்ளநோட்டுகள் அச்சடித்து வந்ததாக தகவல் கிடைத்துள்ளது.

இத்தகவலை அடிப்படையாகக் கொண்டு, காவல்துறையினர் திடீர் சோதனை நடத்தினர். அந்தச் சோதனையின் போது, ரூ.85,000 மதிப்புள்ள கள்ளநோட்டுகள், வாக்கி-டாக்கிகள், ஏர்கன், பிஸ்டல் ஏர்கன், கவுன்டிங் மெஷின் உள்ளிட்ட முக்கிய பொருட்கள் பறிமுதல் செய்யப்பட்டன. மேலும், காவல்துறை சீருடை, ரிசர்வ் வங்கி முத்திரை உள்ளிட்ட பல்வேறு சந்தேகமான பொருட்களும் கைப்பற்றப்பட்டன.

சம்பவ இடத்தில் தற்காலிக கட்டமைப்பை உருவாக்கி, அதில் கள்ளநோட்டுகள் அச்சடித்து வந்த குழுவினர் மீது போலீசார் தீவிர தேடுதல் நடவடிக்கையில் இறங்கியுள்ளனர். இதற்கிடையில், நிலத்தின் உரிமையாளரான செல்வம் தலைமறைவாகியுள்ள நிலையில், அவருக்கு எதிராக வழக்கு பதிவு செய்யப்பட்டுள்ளது. காவல்துறையினர் அவரை கைது செய்ய தீவிர தேடுதல் நடத்தி வருகின்றனர்.

இந்தச் சம்பவம், மாவட்டத்தில் பெரும் அதிர்ச்சியை ஏற்படுத்தி உள்ளது. காவல்துறை அதிகாரிகள், குற்றச்செயலுக்குப் பின்னணியில் இருக்கும் நபர்களை முழுமையாகக் கண்டறிந்து, சம்பந்தப்பட்ட அனைவரையும் கைது செய்வதற்கான முயற்சிகளில் தீவிரமாக செயல்பட்டு வருகின்றனர்.

கள்ளநோட்டுகள் அச்சடிப்பதற்காக குற்றவாளிகள் பயன்படுத்திய இயந்திரங்கள் மற்றும் பொருட்கள் நீதியாலயத்தின் அனுமதியுடன் விஞ்ஞான சோதனைக்கு உட்படுத்தப்பட்டுள்ளன. மேலும், இது தொடர்பாக மேலதிக விசாரணை முன்னெடுக்கப்பட்டு வருகிறது.