உலகம் முழுவதும் புகழ்பெற்ற ஊத்துக்குளியில் வெண்ணெய் மற்றும் நெய் உற்பத்தி செய்யும் தொழில்களில் பாதிக்கும் மேற்பட்டவை, கடந்த இருபதாண்டுகளில் லாபம் குறைதல், கால்நடை பராமரிப்பு செலவு அதிகரிப்பு மற்றும் சரக்கு மற்றும் சேவை வரி அமலாக்கம் உள்ளிட்ட பல காரணங்களால் மூடப்பட்டன.

கடந்த 2005ஆம் ஆண்டில் இந்தத் துறையில் 59 நிறுவனங்கள் இருந்தன, ஆனால் தற்போது 20 நிறுவனங்கள் மட்டுமே செயல்படுகின்றன என்று தகவல் கிடைத்துள்ளது. தமிழக அரசு சிறப்பு திட்டங்களை அறிவிக்க வேண்டும் என்றும், அவற்றை ஜிஎஸ்டி வரம்பில் இருந்து விலக்கி வைக்க வேண்டும் என்றும் தொழில்துறையினர் அரசுக்கு வேண்டுகோள் விடுத்துள்ளனர்.

ஆட்கள் பற்றாக்குறை, அதிக இடுபொருள் செலவு, போதிய மழையில்லாததால் தண்ணீர் பற்றாக்குறை போன்ற காரணங்களால் பலர் பசு மற்றும் எருமை வளர்ப்பை கைவிட்டதே இதற்கு முக்கிய காரணம். மேலும் ஜிஎஸ்டி அமலாக்கம், பூஜ்ஜியத்தில் இருந்து 12% ஆக உயர்த்தப்பட்டதால் தொழில்துறையை பெரிய அளவில் பாதித்தது. இதனால் வெண்ணெய், நெய் விலையை உயர்த்த வேண்டிய கட்டாயம் ஏற்பட்டது. 

வெண்ணெய் கிலோ ரூ.450ல் இருந்து ரூ.500 ஆகவும், நெய்யை ரூ.550ல் இருந்து ரூ.600 ஆகவும் உயர்த்தினோம்.எருமைப்பாலில் இருந்து தயாரிக்கப்படும் நெய், வெண்ணெய் ரூ.50 அதிகம். இதனால் லாபம் குறைந்தது. இந்த விலையில் பெரிய நிறுவனங்களுடன் போட்டியிட முடியாது என அங்குள்ள ஒரு பால் பண்ணை உரிமையாளர் தெரிவித்துள்ளார்.

தற்போதைய சூழலில் ஊத்துக்குளியில் மாதந்தோறும் 45 டன் வெண்ணெய், 30 டன் நெய் மட்டுமே உற்பத்தி செய்யப்படுகிறது. இதற்கு முன் இங்கு உற்பத்தி செய்யப்படும் வெண்ணெய் மற்றும் நெய்யில் 75% மற்ற மாநிலங்களுக்கு சென்றது. 

மற்ற மாநிலங்களில் நம் ஊரில் தயாரிக்கப்படும் பொருட்களின் விலை அதிகமாகக் கருதப்படுவதால் தற்போது உற்பத்தியில் 25% மட்டுமே பிற மாநிலங்களுக்குச் செல்கிறது. ஆனால் ஊத்துக்குளியின் வெண்ணெய் மற்றும் நெய் தரமானதாக இருப்பதால், விலையில் சமரசம் செய்ய முடியாது. தரம்தான் இந்தத் தொழிலைத் தொடர்ந்து நடத்துகிறது. இத்தொழிலை பாதுகாக்க தமிழக அரசு சிறப்பு திட்டங்களை அறிவிக்க வேண்டும் என அங்குள்ள வெண்ணை தயாரிப்பாளர்கள் கோரிக்கை விடுத்துள்ளனர்.