திருவாரூர் மாவட்டத்தில் குடும்பத் தகராறில் தம்பியை கத்தியால் குத்தி அண்ணன் கொலை செய்த சம்பவம் அப்பகுதியில் பரபரப்பையும், அதிர்ச்சியையும் ஏற்படுத்தி உள்ளது.

திருவாரூர் மாவட்டம் வெண்ணவாசல் மேட்டுத்தெரு பகுதியை சேர்ந்தவர் சேகர். இவரது மகன்கள் சக்திவேல் (35), கார்த்திக் (28). இந்நிலையில் நேற்று இரவு கார்த்திக்கின் மனைவி புனிதா, மாமியாரிடம் தகராறில் ஈடுபட்டுள்ளார். இதனை சக்திவேல் தட்டி கேட்டுள்ளார். இதனால் கார்த்திக் மற்றும் சக்திவேல் இடையே தகராறு ஏற்பட்டுள்ளது. இதில் தகராறு முற்றிய நிலையில் ஆத்திரமடைந்த சக்திவேல் கார்த்திகை சரமாரியாக கத்தியால் குத்தியுள்ளார்.

இதையடுத்து பலத்த காயமடைந்த கார்த்திகை மீட்டு சிகிச்சைக்காக அத்திக்கடை ஆரம்ப சுகாதார நிலையத்தில் அனுமதித்தனர். பின்பு அங்கிருந்து மேல் சிகிச்சைக்காக கார்த்திகை திருவாரூர் மருத்துவக் கல்லூரி மருத்துவமனைக்கு கொண்டு சென்றனர். ஆனால் அங்கு பரிசோதனை செய்த மருத்துவர் கார்த்திக் வரும் வழியிலேயே இறந்து விட்டதாக தெரிவித்துள்ளார்.

இதைத்தொடர்ந்து இந்த சம்பவம் குறித்து கார்த்திக்கின் மனைவி புனிதா கொடுத்த புகாரின் அடிப்படையில் வழக்கு பதிவு செய்த போலீசார், குடும்பத் தகராறில் தம்பியை கத்தியால் குத்திக்கொன்ற அண்ணன் சக்திவேலை கைது செய்தனர். இந்த சம்பவம் அப்பகுதியில் பெரும் பரபரப்பை ஏற்படுத்தி உள்ளது.