கள்ளக்குறிச்சி மாவட்டம் கருணாபுரம் பகுதியில் கள்ளச்சாராயம் குடித்து உயிரிழந்தவர்களின் எண்ணிக்கை 68 ஆக உயர்ந்துள்ளதாக தகவல் வெளியாகி பெரும் பரபரப்பு ஏற்படுத்தி உள்ளது.

கள்ளக்குறிச்சி மாவட்டம் கருணாபுரம் பகுதியில் கடந்த ஜூன் 19ஆம் தேதி கள்ளச்சாராயம் குடித்து பத்துக்கும் மேற்பட்டோர் உயிர் இழந்த சம்பவம் நாடு முழுவதும் பெரும் பரபரப்பை ஏற்படுத்தியது.

அதனைத் தொடர்ந்து தொடர்ச்சியாக கள்ளக்குறிச்சி கருணாபுரம் பகுதியில் சேஷா சமுத்திரம், மாதவக்குறிச்சி ஆகிய பகுதிகளில் இருந்து கள்ளச்சாராயம் குடித்த 229 பேர் சிகிச்சைக்காக மருத்துவமனையில் அனுமதிக்கப்பட்ட சம்பவம் பெரும் பரபரப்பை ஏற்படுத்தி நாட்டையே உலுக்கியது.

அதில் சிகிச்சை பலனின்றி 67 பேர் உயிரிழந்தனர். மேலும் 161 பேர் மருத்துவமனையில் சிகிச்சை பெற்று வந்த நிலையில், அனைவரும் குணவடைந்து வீட்டுக்கு திரும்பினார்கள். கருணாபுரம் பகுதியைச் சேர்ந்த மோகன் என்பவர் மட்டும் தொடர்ந்து புதுச்சேரி ஜிப்மர் மருத்துவமனையில் சிகிச்சை பெற்று வந்தார்.

இதனிடையில் அவர் இன்று சிகிச்சை பலனின்றி உயிரிழந்துள்ளதாக தகவல் வெளியாகி பெரும் பரபரப்பை ஏற்படுத்தி உள்ளது. இதனால் கள்ளக்குறிச்சியில் கள்ளச்சாராயம் குடித்து உயிரிழந்தவர்களின் எண்ணிக்கை 68 ஆக உயர்ந்துள்ளது.

கள்ளச்சாராயம் வழக்கு தொடர்பாக விழுப்புரம் சிபிசிஐடி போலீசார் வழக்கு பதிவு செய்து 24 பேரை கைது செய்து கடலூர் மத்திய சிறையில் அடைத்துள்ளனர். கள்ளக்குறிச்சி மாவட்டத்தின் பல்வேறு பகுதிகளில் போலீசார் தீவிர வாகன சோதனையில் ஈடுபட்டு வருகின்றனர்.