சென்னையில் நள்ளிரவில் வீடு புகுந்து ஆறு வயது சிறுமிக்கு பாலியல் தொந்தரவு கொடுத்த போதை இளைஞரை போலீசார் கைது செய்தனர்.

சென்னை பட்டினப்பாக்கம் சீனிவாசபுரம் பகுதியை சேர்ந்தவர் 6 வயது சிறுமி. இவர் நேற்று நள்ளிரவு பெற்றோருடன் வீட்டில் தூங்கிக் கொண்டிருந்தபோது, மர்ம நபர் ஒருவர் சிறுமிக்கு பாலியல் தொந்தரவு கொடுத்துள்ளார். இதையடுத்து சிறுமியின் அழுகிற சத்தம் கேட்டு தாய் கண் விழித்துப் பார்த்துள்ளார்.

அப்பொழுது சிறுமிக்கு மர்ம நபர் பாலியல் தொந்தரவு கொடுப்பதை கண்டு அதிர்ச்சி அடைந்தார். இதைத்தொடர்ந்து தாய் கூச்சலிடவே மர்ம நபர் அங்கிருந்து தப்பி ஓட முயன்றுள்ளார். ஆனால் அப்பகுதியை சேர்ந்த பொதுமக்கள் மர்ம நபரை மடக்கிப்பிடித்து தர்மடி கொடுத்தனர்.

இதைத்தொடர்ந்து அந்த நபர் கஞ்சா போதையில் இருந்ததால் அப்பகுதியை சேர்ந்தவர்கள் கண்ணில் மிளகாய் பொடி தூவி, கைகளை கட்டி போலீசாரிடம்  ஒப்படைத்தனர். இதையடுத்து போலீசார் இந்த சம்பவம் குறித்து விசாரணை நடத்தியதில் அந்த நபர் அதே பகுதியை சேர்ந்த விக்னேஷ் (22) என்பதும், அவர் எப்பொழுதும் கஞ்சா போதையிலே இருபத்தும் தெரிய வந்தது.

மேலும் சில நாட்களுக்கு முன்பு அதே பகுதியை சேர்ந்த ஐந்து வயது சிறுவனிடம் தகாத முறையில் நடந்து கொண்டதும் விசாரணையில் தெரியவந்தது. இதைத்தொடர்ந்து இந்த சம்பவம் குறித்து வழக்கு பதிவு செய்த போலீசார் விக்னேஷை கைது செய்து தொடர்ந்து விசாரணை மேற்கொண்டு வருகின்றனர்.