அமெரிக்கா: பல்கலைக்கழக வளாகத்தில் துப்பாக்கிச்சூடு - 3 மாணவர்கள் உயிரிழப்பு

அமெரிக்காவில் பல்கலைக்கழக வளாகத்தில் நடந்த துப்பாக்கிச் சூட்டில் மூன்று மாணவர்கள் உயிரிழந்துள்ளனர்.

அமெரிக்கா வர்ஜீனியா மாகாணத்தின் சார்லோட்டஸ்வில்லே நகரில் வர்ஜீனியா பல்கலைக்கழகம் அமைந்துள்ளது. இந்த பல்கலைக்கழகத்தின் கால்பந்தாட்ட அணியை சேர்ந்த மாணவர்கள் பல்கலைக்கழத்துக்கு வெளியே நடந்த போட்டியில் பங்கேற்றுவிட்டு பேருந்தில் பல்கலைக்கழகத்துக்கு சென்று கொண்டிருந்தனர்.

அப்பொழுது பேருந்து பல்கலைக்கழக வளாகத்துக்குள் வந்தபோது அங்கிருந்த மாணவர் ஒருவர் பேருந்து மீது துப்பாக்கியால் சரமாரியாக சுட்டுள்ளார். இதில் பேருந்தில் இருந்த 3 மாணவர்கள் ரத்த வெள்ளத்தில் துடிதுடித்து உயிரிழந்துள்ளனர்.

மேலும் 2 மாணவர்கள் பலத்த காயமடைந்த நிலையில், உடனடியாக மீட்கப்பட்டு சிகிச்சைக்காக அருகில் உள்ள மருத்துவமனையில் அனுமதிக்கப்பட்டனர். இதையடுத்து பல்கலைக்கழகத்தில் பாதுகாப்பு பணியில் ஈடுபட்டிருந்த போலீசார் தாக்குதல் நடத்திய மாணவரை கைது செய்து, இந்த துப்பாக்கி சூட்டிற்கான காரணம் குறித்து விசாரணை மேற்கொண்டு வருகின்றனர்.