நடிகர் விஜய்யின் தந்தையும், இயக்குநருமான எஸ்.ஏ. சந்திரசேகர் சின்னத்திரையில் முதல்முதலில் நடிக்கும் தொடர் 'கிழக்கு வாசல்'. இன்று முதல் இந்தத் தொடர் இரவு 10 மணிக்கு ஒளிபரப்பாகவுள்ளது. 

அவ்வபோது விஜய் தொலைக்காட்சியில் புதிய தொடர்கள் ஒளிபரப்பாகி வருகின்ற நிலையில், முன்னதாக விஜய் தொலைக்காட்சியில் ஒளிபரப்பாகி வந்த பாரதி கண்ணம்மா -2 தொடர் கடந்த வாரத்துடன் முடிவடைந்தது. 

இதனை அடுத்து 'கிழக்கு வாசல்' தொடர், இந்த வாரத்தின் முதல் நாளான இன்று முதல் ஒளிபரப்பாகவுள்ளது. இதில் முதல்முறையாக இயக்குனர் எஸ்.ஏ.சந்திரசேகர் சின்னத்திரை தொடரில் பிரதான பாத்திரத்தில் நடிக்கின்றார்.

வில்லன் கதாபாத்திரத்தில், மறைந்த மூத்த நடிகர் நாகேஷ் மகன் ஆனந்த் பாபு நடிக்கவுள்ளார்.

ஏராளமான தொலைக்காட்சி தொடர்களில் ஆனந்த் பாபு நடித்துள்ளார். குறிப்பாக சூலம், குலவிளக்கு, மனைவி, கஸ்தூரி, மெளன ராகம், மெளன ராகம்-2 ஆகிய தொடர்களில் நடித்துள்ளார். 

கிழக்கு வாசல் தொடரில் ரேஷ்மா முரளிதரன், தாரிணி, வெங்கட் ரங்கநாதன் உள்ளிட்ட பலர் நடிக்கின்றனர். ரேஷ்மா முரளிதரன் முதலில் ஜீ தமிழின் பூவே பூச்சூடவா தொடரில் நடித்து புகழ் பெற்றவர். 

நடிகை ராதிகா சரத்குமார் ரடான் மீடியா சார்பில், கிழக்கு வாசல் தொடரை தயாரிக்கிறார். இந்தத் தொடரில் எஸ்.ஏ. சந்திரசேகர் நடிப்பதால், எதிர்பார்ப்பும் அதிகரித்துள்ளது.