வெற்றிமாறன் இயக்கத்தில் தனுஷ் நடிப்பில் உருவாகி இருக்கும் ‘அசுரன்’ படத்தின் டிரைலர் வெளியாகி சாதனை படைத்துள்ளது.

பூமணி எழுதிய வெக்கை நாவலை அடிப்படையாக கொண்டு வெற்றி மாறன் இயக்கியுள்ள படம் அசுரன். வடசென்னை படத்துக்கு பின் வெற்றிமாறன் தனுஷுடன் இணைந்து பணியாற்றி இருக்கிறார். கலைப்புலி எஸ் தாணு தயாரிக்கும் இந்த படத்தின் மூலம் மஞ்சு வாரியர் தமிழ் திரையுலகில் கதாநாயகியாக அறிமுகமாகிறார். 

விசாரணை படத்திற்கு பின் வெற்றிமாறன் நாவலை தழுவி எடுக்கும் படம் என்பதால் படத்தின் மீதான எதிர்பார்ப்பு இன்னும் அதிகரித்திருக்கிறது. இந்நிலையில், நேற்று மாலை அசுரன் படத்தின் முன்னோட்டம் வெளியானது.

வெளியிட்ட 1 மணி நேரங்களில் 15 லட்சம் பேர் பார்த்துள்ளனர். தற்போது வரை 27 லட்சம் பார்வையாளர்கள் பார்த்துள்ளனர். டிரெய்லரே அடர்த்தியும், அழுத்தமுமாக வந்திருக்கிறது. 

‘நம்ம கிட்ட காடு இருந்தா எடுத்திருக்கிருவானுக, ரூவா இருந்தா புடிங்கிக்கிருவானுக, படிப்ப மட்டும் நம்ம கிட்டயிருந்து எடுத்துக்கவே முடியாது’ என தனுஷ் பேசும் வசனம் நெடுங்கால அரசியலையும், படத்தின் மையத்தையும் பேசுவதாக அமைந்திருக்கிறது. 

தனுஷ் இளைஞனாகவும், வயதான கதாபாத்திரமாகவும் தோன்றி இருக்கிறார். பசுபதி, கருணாஸ் மகன் கென், பாலாஜி சக்திவேல் உள்ளிட்டோர் படத்தில் நடித்துள்ளனர். வேல்ராஜ் ஒளிப்பதிவு செய்ய ஜி.வி.பிரகாஷ் இசை அமைத்துள்ளார். அக்டோபர் 4ந்தேதி அசுரன் வெளியாகவிருக்கிறது.