நடிகர் சிவகார்த்திகேயன் பல திரைப்படங்களை தனது எஸ்கே புரோடக்சன்ஸ் நிறுவனத்தின் மூலம் தயாரித்து வருகிறார். அதன்படி சூரி நடிப்பில் உருவாகியுள்ள கொட்டுக்காளி  திரைப்படத்தை சிவகார்த்திகேயன் தயாரித்திருக்கிறார். இந்த படத்தை கூழாங்கல் படத்தின் இயக்குனர் பி எஸ் வினோத் ராஜ் இயக்கியுள்ளார்.

இந்த படத்தில்  சூரியுடன் இணைந்து அன்னா பென் முக்கிய கதாபாத்திரத்தில் நடித்துள்ளார்.  
இந்த படமானது ரிலீஸுக்கு முன்பே பல சர்வதேச திரைப்பட விழாக்களில் திரையிடப்பட்டு பார்வையாளர்களிடம் பாராட்டுகளை பெற்ற நிலையில், இந்த படம் நேற்று வெளியானது.

இதே போல் பரியேறும் பெருமாள், கர்ணன், மாமன்னன் படத்தை இயக்கிய மாரி செல்வராஜ் அடுத்ததாக வாழை என்ற படத்தைத் தயாரித்து இயக்கியுள்ளார். இந்தப் படமும் நேற்று  திரையரங்குகளில் வெளியாகி வரவேற்பை பெற்றுள்ளது. உண்மைச் சம்பவத்தை அடிப்படையாகக் கொண்டு உருவான இப்படத்தில் நிகிலா விமல், கலையரசன், திவ்யா துரைசாமி ஆகியோர் நடித்துள்ளனர்.

இப்படத்தைப் பார்த்த இயக்குநர்கள் மற்றும் சினிமாத்துறையைச் சேர்ந்தவர்கள் பலரும் பாராட்டி வருகின்றனர். இந்நிலையில் இப்படத்தின் முதல் நாள் வசூல் குறித்த தகவல் வெளியாகியுள்ளது. அதன்படி இதில், இந்திய அளவில்  வாழை திரைப்படம் ரூ. 1.15 கோடியையும் கொட்டுக்காளி ரூ. 50 லட்சத்தையும் முதல் நாளில் வசூல் செய்துள்ளதாக வெளியாகியுள்ளது.