தமிழகம் முழுவதும் அண்ணா பல்கலைகழகத்தின் கீழ் இயங்கும், 433 பொறியியல் கல்லுாரிகளில், இளநிலை படிப்புகளுக்கு, 1.79 லட்சம் இடங்கள் உள்ளன. இதனை நிரப்புவதற்கான கலந்தாய்வு, தொழில்நுட்ப கல்வி இயக்குனரகம் வாயிலாக, இணைய வழியில் நடத்தப்படுகிறது.

இந்த நிலையில், இந்தாண்டு கலந்தாய்வுக்கு, 2 லட்சத்து 9,645 பேர் விண்ணப்பித்துள்ளனர். அவர்களில், 1 லட்சத்து 99,868 பேர் கலந்தாய்வில் பங்கேற்க தகுதி பெற்றதுடன், அவர்களுக்கான தரவரிசை பட்டியல், கடந்த 10 ஆம் தேதி வெளியானது. தொடர்ந்து, மாணவர்களுக்கான கலந்தாய்வு கடந்த 22 ஆம் தேதி ஆரம்பமானது.

இதில் முதற்கட்டமாக, ஜூலை 22 முதல் 27- வரை முன்னாள் ராணுவ வீரர்களின் குழந்தைகள், மாற்றுத்திறனாளிகள் மற்றும் விளையாட்டு பிரிவு மாணவர்களுக்கான சிறப்பு பிரிவு கலந்தாய்வு நடைபெற்றது. 

இதையடுத்து இன்று முதல் பொதுப்பிரிவுக்கான கலந்தாய்வு ஆரம்பமாகிறது. முதல் சுற்று கலந்தாய்வு வருகிற ஆகஸ்ட் 10- ஆம் தேதி வரை நடைபெறுகிறது. இதில், 26,654 மாணவர்கள் பங்கேற்கின்றனர்.

இந்தக் கலந்தாய்வுத் தொடர்பான கூடுதல் விபரங்களை, https://www.tneaonline.org/ என்ற வலைதளத்தில் அறிந்து கொள்ளலாம். மூன்று சுற்றுகளாக நடக்கும் இந்த கலந்தாய்வு, வருகிற செப்டம்பர் மாதம் 3 ஆம் தேதியுடன் நிறைவு பெறுகிறது.