கூட்டத்தின் போது கேம் ஆடிய முதலமைச்சர் - வைரலாகும் புகைப்படம்.!

சத்தீஷ்கர் மாநிலத்தில் நவம்பர் 7 மற்றும் 17 உள்ளிட்ட தேதிகளில் இரண்டு கட்டமாக சட்டமன்றத் தேர்தல் நடைபெற உள்ளது. இந்தது தேர்தலுக்காக, நேற்று முன்தினம் காங்கிரஸ் வேட்பாளர்கள் தேர்வுக் குழு கூட்டம் நடைபெற்றது.

அந்தக் கூட்டத்தில், மேலிட பொறுப்பாளர் குமாரி செல்ஜா, மாநில காங்கிரஸ் தலைவர் தீபக் பைஜ் உள்ளிட்ட பலர்  கலந்துகொண்டனர். மேலும், இந்தக் கூட்டத்தில் தேர்வுக்குழு தலைவர் அஜய் மக்கான், காணொலி காட்சி மூலம் கலந்து கொண்டார்.

இந்தக் கூட்டத்தின் போது, முதல்வர் பூபேஷ் பகேல், தனது செல்போனில் 'கேன்டி கிரஷ்' விளையாடிக் கொண்டிருந்ததாக ஒரு புகைப்படத்தை பாஜக தகவல் தொழில்நுட்ப பிரிவு தலைவர் அமித் மாளவியா வெளியிட்டுள்ளார்.

அத்துடன் ''காங்கிரஸ், ஆட்சியை தக்கவைக்காது என்று தெரிந்ததால், பாகல் பதற்றமின்றி இருக்கிறார்'' என்றும் குறிப்பிட்டிருந்தார். இதற்கு பதிலளித்துள்ள முதல்வர் பூபேஷ் பகேல், "இதற்கு முன்பு நான் பாரம்பரிய விளையாட்டுகளை விளையாடியதையும் பா.ஜனதா ஆட்சேபித்தது. 

தற்போது, கூட்டம் தொடங்குவதற்கு முன்பு செல்போனில் 'கேன்டி கிரஷ்' ஆடியதையும் எதிர்க்கிறது. நான் தொடர்ந்து விளையாடுவேன். யார் ஆட்சியில் இருக்க வேண்டும் என்பதை மக்கள்தான் தீர்மானிப்பார்கள்." என்று தெரிவித்துள்ளார்.