மனைவியின் நட்பு! சந்தேகத்தால் சுத்தியலால் அடித்து கொலை: உத்தரப்பிரதேசத்தில் அதிர்ச்சி சம்பவம்**

உத்தரப் பிரதேசம், நொய்டாவில் மனைவியின் நட்புறவை சந்தேகித்து கணவர் கொலை செய்த சம்பவம் பெரும் பரபரப்பை ஏற்படுத்தியுள்ளது.

செக்டர் 15 பகுதியில் வசித்து வந்த ஹைதர் (55) மற்றும் அவரது மனைவி அஸ்மா கான் (44), இருவரும் பொறியியல் பட்டதாரிகள். அஸ்மா தனியார் நிறுவனத்தில் மென்பொருள் பொறியாளராக பணியாற்றி வந்தார். ஆனால் ஹைதர் வேலை இல்லாமல் வீட்டிலேயே இருந்துள்ளார்.

சமீபமாக, மனைவிக்கு திருமணத்திற்கு வெளியே தொடர்புகள் இருப்பதாக ஹைதர் சந்தேகித்ததாக தெரிவிக்கப்பட்டுள்ளது. இதனால், அவருக்கு மன அழுத்தம் அதிகரித்திருந்தது. தம்பதிக்குள் அடிக்கடி தகராறுகள் ஏற்பட்டதாகவும் போலீசார் தெரிவித்தனர்.

இந்த மனஅழுத்தத்தின் உச்சமாக, நேற்று காலை 5 மணியளவில் ஹைதர் தனது மனைவியின் தலையில் சுத்தியலால் பலமுறை அடித்து கொலை செய்தார். பின்னர் வீட்டிலிருந்து இரு கிலோமீட்டர் தொலைவில் உள்ள காவல் நிலையத்திற்குச் சென்று நேரடியாக சரணடைந்தார்.

சம்பவம் நடந்ததும், தாயின் நிலை குறித்து மகன் தனது உறவினர்களுக்கு தகவல் தெரிவித்தார். ஆனால், அவர்கள் வருவதற்குள் ஹைதர் போலீசிடம் சரணடைந்துள்ளார்..

போலீசார் அஸ்மாவின் உடலை மீட்டு, சுத்தியலை கைப்பற்றி விசாரணை நடத்தி வருகின்றனர்.