திமுகவுக்கு நேரமும் குறிச்சாச்சு.. வெளியாகப் போகும் "DMK FILES".. அண்ணாமலையின் பரபரப்பு ட்விட்..!!

கடந்த சில மாதங்களுக்கு முன் திமுக அமைச்சர் செந்தில் பாலாஜி பாஜக மாநில தலைவர் அண்ணாமலை கையில் கட்டியிருக்கும் ரபேல் கடிகாரம் பற்றிய கேள்வி எழுப்பி அதன் விலை பற்றி கேட்டிருந்தார். இந்த விவகாரம் இரு கட்சி தலைவர்களிடையே பெரும் விவாதத்தினை ஏற்படுத்தி கருத்து மோதலாக உருவெடுத்தது. அண்ணாமலையின் ரபேல் வாட்ச் பில்லை கேட்டு திமுகவினர் சென்னை, ஈரோடு, கோவை மற்றும் தமிழகத்தின் பல்வேறு பகுதிகளில் போஸ்டர் ஒட்டுனர். இதற்கு பதிலளித்த அண்ணாமலை கடிகாரத்தின் பில் மற்றும் தனது சொத்து மதிப்போடு திமுக அமைச்சர்கள் செய்த ஊழல்கள் ஏப்ரல் 14ம் தேதி அதிகாரப்பூர்வ வெளியிடப்படும் என்று தெரிவித்திருந்தார்.

மேலும் திமுக தலைவர் மு.க ஸ்டாலின், அவருடைய குடும்பத்தினர் மற்றும் அமைச்சர்களின் சொத்துப்பட்டியல் மற்றும் அதன் இருப்பிடம் ஆதாரமாக வெளியிடப்படும் எனவும் ஒரு பென்டிரைவில் அதன் நகல் ஊடக நிறுவனங்களுக்கும் வழங்கப்படும் எனவும் அறிவித்திருந்தார். துபாயில் வணிகம், வணிக வளாகங்கள் மற்றும் உள்கட்டமைப்பு ஆகியவற்றில் அவர்களின் அனைத்து முதலீடுகளும் அதில் பிரதிபலிக்கும் எனவும் தெரிவித்திருந்தார்.

மேலும் தனது 10 ஆண்டு கால வங்கிக் கணக்குகளுடன் அனைத்தும் விரைவில் பொதுமக்களுக்காக வெளியிடப்படும் என்று அண்ணாமலை அறிவித்திருந்தார். இந்நிலையில் பாஜக மாநில தலைவர் அண்ணாமலை தனது ட்விட்டர் பக்கத்தில் "DMK FILES" என்று பெயரிடப்பட்டிருக்கும் திமுக ஊழல் பட்டியல், நாளை (ஏப்ரல்.14) காலை 10:15 மணிக்கு வெளியாகும் என அறிவித்துள்ளார். அந்த பதிவில் கருணாநிதி குடும்பத்தினரின் புகைப்படங்கள் அடங்கிய வீடியோ இடம் பெற்றுள்ளது என்பது குறிப்பிடத்தக்கது.