தமிழக சட்டமன்ற தேர்தல் 2026ல் 200 தொகுதிகளை வெல்லும் இலக்குடன் தி.மு.க. தேர்தல் பணிகளை கடந்த மதம் முதலே தீவிரப்படுத்தி வருகிறது.

இந்நிலையில், தொகுதிகளின் தற்போதைய நிலையை மதிப்பீடு செய்ய தி.மு.க. 234 தொகுதிகளிலும் ரகசிய ஆய்வை மேற்கொண்டுள்ளதாக பிரபல செய்தி நிறுவனம் ஒன்று செய்தி வெளியிட்டுள்ளது.

அதன்படி, தனியார் நிறுவனம் மூலம் நடத்தப்பட்ட இந்த ஆய்வில், பொதுமக்களின் மனநிலை, தி.மு.க. எம்.எல்.ஏ.க்களின் செயல்பாடு, மற்றும் தொகுதி முறையில் செல்வாக்கு பெற்ற நபர்களின் தாக்கம் போன்ற அம்சங்கள் கண்காணிக்கப்பட்டுள்ளன.

ஆய்வு முடிவுகளின்படி, சுமார் 50 தொகுதிகளில் தி.மு.க. 100% வெற்றி பெறும் நிலை உள்ளது என்று தெரிவிக்கப்பட்டுள்ளது. இந்த ஆய்வு முடிவு திமுகவை மகிழ்ச்சியில் ஆழ்த்தியதுடன், கூட்டணி காட்சிகள் நெருக்கடி கொடுத்தாலும் சமாளிக்கலாம் என்ற நம்பிக்கையையும் கொடுத்துள்ளதாக தெரியவந்துள்ளது.

மற்ற தொகுதிகளில், குறிப்பாக சில இடங்களில், தி.மு.க. எம்.எல்.ஏ.க்கள் மீது மக்கள் அதிருப்தியாக உள்ளதாகவும், உள்கட்சி வேற்றுமை காரணமாக இது ஏற்பட்டிருப்பதாகவும் ஆய்வில் தெரிவிக்கப்பட்டுள்ளது. 

இதையடுத்து, சம்மந்தப்பட்ட அந்த தொகுதிகளில் நிர்வாகிகளை மாற்றி அமைத்து, வெற்றியை உறுதி செய்யும் நோக்கில் திமுக கட்சி மேலிடம் தீவிர ஆலோசனையில் ஈடுபட்டுள்ளது.

இது ஒருபுறம் இருக்க அ.தி.மு.க.வும் தொகுதி நிலை ஆய்வை மேற்கொண்டுள்ளதாக தகவல் கிடைத்துள்ளது. அதில், அதிமுக வலிமையான ஒரு கூட்டணியை அமைக்க வேண்டும் என்ற கட்டாய நிலைக்கு தள்ளப்பட்டு உள்ளதாக அந்த முடிவுகள் தெரிவித்துள்ளதாகவும் சொல்லப்படுகிறது.