அதிமுக பொதுச்செயலாளராக எடப்பாடி பழனிச்சாமி தேர்வு செய்யப்பட்டுள்ளதற்கு, பா.ம.க. தலைவர் மருத்துவர் அன்புமணி இராமதாஸ்  வாழ்த்து தெரிவித்துள்ளார்.

இதுகுறித்த அவரின் வாழ்த்துச் செய்தியில், "அதிமுகவின் பொதுச்செயலாளராக தேர்ந்தெடுக்கப்பட்டுள்ள அக்கட்சியின் இடைக்காலப் பொதுச்செயலாளர் எடப்பாடி பழனிச்சாமி அவர்களுக்கு பாட்டாளி மக்கள் கட்சி சார்பில்  வாழ்த்துகளை தெரிவித்துக் கொள்கிறேன்.  புதிய பொறுப்பில் அவரது பணி சிறக்க வாழ்த்துகள்" என்று அன்புமணி இராமதாஸ் தெரிவித்துள்ளார்.

அதிமுக வழக்கு விவரம் : கடந்த ஆண்டு நடைபெற்ற அதிமுகவின் பொதுக்குழு செல்லும் என்று உச்சநீதிமன்றம் தீர்ப்பளித்த நிலையில், அந்த பொதுக்குழுவில் நிறைவேற்றப்பட்ட தீர்மானங்களை எதிர்த்து ஓபிஎஸ் தரப்பில் சென்னை உயர்நீதிமன்றத்தில் வழக்கு தொடரப்பட்டது.

இதற்கிடையே அதிமுகவின் பொது செயலாளர் தேர்தல் அறிவிக்கப்பட்டதால், அதனையும் எதிர்த்து ஓ பன்னீர்செல்வம் மற்றும் அவரின் ஆதரவாளர்கள் வழக்கு தொடர்ந்தனார். 

அதிமுகவின் பொதுச்செயலாளர் தேர்தலை எதிர்த்த வழக்கில் இடைக்கால உத்தரவாக, தேர்தலை நடத்த தடை இல்லை, பொதுக்குழு தீர்மானங்கள் வழக்கு விசாரணையின் தீர்ப்புக்குப் பிறகு பொதுச் செயலாளர் முடிவுகளை வெளியிடலாம் என்று சென்னை உயர்நீதிமன்றம் உத்தரவு பிறப்பித்தது.

இந்த நிலையில், இன்று அதிமுக பொதுகுழு தீர்மானங்கள் மற்றும் பொதுச் செயலாளர் தேர்தலை எதிர்த்த வழக்குகளின் தீர்ப்பை சென்னை உயர்நீதிமன்றம் வழங்கி உள்ளது.

அதன்படி ஓ பன்னீர்செல்வம் மற்றும் அவரின் ஆதரவாளர்கள் தொடர்ந்து அனைத்து மனுக்களையும் தள்ளுபடி செய்வதாக சென்னை உயர்நீதிமன்றம் உத்தரவு பிறப்பித்துள்ளது.

சென்னை உயர்நீதிமன்றத்தின் இந்த தீர்ப்பை அடுத்து, அதிமுகவின் பொதுச் செயலாளராக எடப்பாடி பழனிச்சாமி போட்டி இன்றி தேர்ந்தெடுக்கப்பட்டுள்ளார்.

அவருக்கு மூத்த தலைவர்கள், முன்னாள் அமைச்சர்கள், எம்எல்ஏக்கள், நிர்வாகிகள், தொண்டர்கள், பல்வேறு தரப்பினர் தங்களது வாழ்த்துக்களையும், மகிழ்ச்சியையும் தெரிவித்து வருகின்றனர்.